- ಆರತಿ ಬೆಳಗಿ ವ್ಯಸನಿಗಳ ಸ್ವಾಗತ
- ಬಸವಮಾರ್ಗ ಫೌಂಡೇಷನ್ ನಿಂದ 10 ದಿನ ಆಯೋಜನೆ
- ಹಾರ ಹಾಕಿ ಬರಮಾಡಿಕೊಂಡ ಎಸ್.ಬಸವರಾಜು
ಮೈಸೂರು : ನಗರದ ಹೆಬ್ಬಾಳ ರಿಂಗ್ ರಸ್ತೆಯಲ್ಲಿರುವ ಬಸವಮಾರ್ಗ ವ್ಯಸನಮುಕ್ತ ಮತ್ತು ಪುನರ್ವಸತಿ ಕೇಂದ್ರದಿಂದ ಮಹಿಳೆಯರು ಹಾಗೂ ಪುರಿಷರಿಗೆ ಆಯೋಜಿಸಿರುವ 10 ದಿನಗಳ ಕುಡಿತ ಬಿಡಿಸುವ ಉಚಿತ ಶಿಬಿರಕ್ಕೆ ಭಾನುವಾರ ಚಾಲನೆ ಸಿಕ್ಕಿತು.
ಶಿಬಿರಕ್ಕೆ ದಾಖಲಾದ ವ್ಯಸನಿಗಳಿಗೆ ಸಂಸ್ಥೆಯ ಸಂಸ್ಥಾಪಕ ಎಸ್. ಬಸವರಾಜು, ಹೂವಿನ ಹಾರ ಹಾಕಿ, ಆರತಿ ಬೆಳಗಿ ವಿನೂತನವಾಗಿ ಬರಮಾಡಿಕೊಂಡರು. ಶಿವಲಿಂಗಕ್ಕೆ ವಿಶೇಷ ಪೂಜೆ ಸಲ್ಲಿಸಲಾಯಿತು. ವ್ಯಸನಮುಕ್ತರಾಗಿ ಜೀವನ ನಡೆಸುವಂತೆ ಕಂಕಣ ಕಟ್ಟಿಸಿ ಸಂಕಲ್ಪ ಮಾಡಿಸಲಾಯಿತು.
ವೇದಿಕೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಎಸ್.ಬಸವರಾಜು, ಬಸವಮಾರ್ಗ ಸಂಸ್ಥೆ ಕಳೆದ 6 ವರ್ಷಗಳಿಂದ ನಿರಂತರ ಸೇವೆ ನೀಡುತ್ತಿದೆ. ಇದುವರೆಗೆ 54 ಉಚಿತ ಶಿಬಿರಗಳನ್ನು ಯಶಸ್ವಿಯಾಗಿ ಪೂರೈಸಿದೆ. 12 ಸಾವಿರಕ್ಕೂ ಹೆಚ್ಚು ವ್ಯಸನಿಗಳು ವ್ಯಸನದಿಂದ ಹೊರ ಬಂದಿದ್ದಾರೆ. ಸಾವಿರಾರು ಕುಟುಂಬ ಇಂದು ನೆಮ್ಮದಿ ಜೀವನ ನಡೆಸುತ್ತಿವೆ. 55ನೇ ಶಿಬಿರದಲ್ಲಿ ನಿರೀಕ್ಷೆಗೂ ಮೀರದ ಜನರು ಬಂದಿದ್ದಾರೆ. ಇದೇ ಮೊದಲ ಬಾರಿಗೆ ದಾಖಲೆ ಪ್ರಮಾಣದಲ್ಲಿ ದಾಖಲಾತಿ ಆಗಿದೆ. ಶಿಬಿರಾರ್ಥಿಗಳಿಗೆ 10 ದಿನ ನಿರಂತರ ತರಬೇತಿ ನೀಡಲಾಗುತ್ತದೆ. ಒಬ್ಬ ವ್ಯಸನಿ, ವ್ಯಸನ ಬಿಡುತ್ತೇನೆ ಎನ್ನುವುದೇ ದೊಡ್ಡ ಸಾಧನೆ. ಆದ್ದರಿಂದಲೆ ಹಾರ ಹಾಕಿ, ಆರತಿ ಬೆಳಗಿ ದಾಖಲು ಮಾಡಿಕೊಳ್ಳಲಾಗಿದೆ. ಆ ಮೂಲಕ ವ್ಯಸನದ ವಿರುದ್ಧ ಸಂಭ್ರಮಾಚರಣೆ ಮಾಡಲಾಗಿದೆ ಎಂದು ವಿನೂತನ ಪ್ರಯೋಗದ ವಿವರಣೆ ನೀಡಿದರು.
ಕುಟುಂಬವಾಗಲಿ, ಸಮಾಜವಾಗಲಿ ವ್ಯಸನವನ್ನು ದ್ವೇಷಿಸಬೇಕೆ ಹೊರತು ವ್ಯಸನಿಯನ್ನಲ್ಲ. ವ್ಯಸನಿಯನ್ನು ಪ್ರೀತಿ, ಕರುಣೆ, ಅಧ್ಯಾತ್ಮದ ಮೂಲಕ ಹೊರತರಬೇಕು. ಅದರ ಹೊರತು ನೋವುಂಟು ಮಾಡುವುದರಿಂದ ಪ್ರಯೋಜನವಿಲ್ಲ. ದೇಹಕ್ಕೂ, ಮನಸ್ಸಿಗೂ ನೋವುಂಟು ಮಾಡದೇ ವ್ಯಸನ ಬಿಡಿಸುವುದೆ ನಮ್ಮ ಸಂಸ್ಥೆಯ ಗುರಿ. ಬಸವಮಾರ್ಗದಲ್ಲಿ ವ್ಯಸನಿಗಳ ಚೀರಾಟ, ಕೂಗಾಟದ ಬದಲು, ಪ್ರಾರ್ಥನೆ ಕೇಳುತ್ತದೆ. ವ್ಯಸನಿಯ ಮನಪರಿವರ್ತನೆಗೆ ಪೂರಕ ವಾತಾವರಣ ಇಲ್ಲಿ ಕಲ್ಪಿಸಿಕೊಡಲಾಗುತ್ತದೆ. ಯೋಗ, ಧ್ಯಾನ, ಅಧ್ಯಾತ್ಮ, ಪೂಜೆ, ಆಪ್ತ ಸಮಾಲೋಚನೆ, ತರಗತಿ, ವ್ಯಕ್ತಿತ್ವ ವಿಕಸನ, ಮನರೋರಂಜನೆ, ಸ್ಪರ್ಧೆ, ಎಎ ಮೀಟಿಂಗ್, ಪೌಷ್ಠಿಕ ಆಹಾರದ ಮೂಲಕ ಆರೋಗ್ಯ ಸಂಬಂಧಿತ ಚಿಕಿತ್ಸೆ ನೀಡಲಾಗುತ್ತದೆ. ವ್ಯಸನಿಯ ಮನ ಗೆದ್ದು, ಕುಟುಂಬ, ಸಮಾಜದ ಜವಾಬ್ದಾರಿ ಮನವರಿಕೆ ಮಾಡಿಕೊಟ್ಟು ಬದಲಾಯಿಸಲಾಗುತ್ತದೆ. ಆ ಮೂಲಕ ವ್ಯಸನ ತ್ಯಜಿಸಲು ವೇದಿಕೆ ಕಲ್ಪಿಸಿಕೊಡಲಾಗುತ್ತದೆ ಎಂದು ತಿಳಿಸಿದರು.
ಬಸವಮಾರ್ಗ ವ್ಯಸನಮುಕ್ತ ಮತ್ತು ಪುನರ್ವಸತಿ ಕೇಂದ್ರ, ವ್ಯಸನಮುಕ್ತ ಸಮಾಜ ನಿರ್ಮಾಣದ ಕನಸ ಹೊಂದಿದೆ. ಇಷ್ಟು ವರ್ಷ ಕೇವಲ ಪುರುಷರಿಗಷ್ಟೆ ಸೀಮಿತವಾಗಿದ್ದ ಪುನರ್ವಸತಿ ಕೇಂದ್ರವನ್ನು ಈಗ ಮಹಿಳೆಯರಿಗೂ ವಿಸ್ತಾರ ಮಾಡಲಾಗಿದೆ. ಮಹಿಳೆಯರಿಗೆಂದೆ ಪ್ರತ್ಯೇಕ ಪುನರ್ವಸತಿ ಕೇಂದ್ರವನ್ನು ನಗರದ ಸರಸ್ವತಿಪುರಂನಲ್ಲಿ ತೆರೆದು ಈಗಾಗಲೆ ಕೆಲಸ ಪ್ರಾರಂಭಿಸಲಾಗಿದೆ. ಮಹಿಳೆಯರ ದಾಖಲಾತಿಯಲ್ಲಿ ಸಂಸ್ಥೆ ಗುಪ್ತತೆಯನ್ನು ಕಾಯ್ದುಕೊಳ್ಳುತ್ತದೆ. ಮಹಿಳೆ ವ್ಯಸನಕ್ಕೆ ದಾಸರಾಗಿದ್ದರೆ ನಮ್ಮಲ್ಲಿ ದಾಖಲಾಗಿ ಅಗತ್ಯ ಚಿಕಿತ್ಸೆ ಪಡೆಯಬಹುದು. ಮಹಿಳೆಯರಿಗೂ ಕೂಡ ಉಚಿತ ಶಿಬಿರಗಳನ್ನು ಸಂಸ್ಥೆ ಆಯೋಜಿಸಿದ್ದು, ಇದರ ಸದ್ಬಳಕೆ ಮಾಡಿಕೊಳ್ಳಬೇಕು. ಜತೆಗೆ ಶೀಘ್ರದಲ್ಲೆ 18 ವರ್ಷದ ಒಳಗಿನ ಮಕ್ಕಳಿಗೂ ಪುನರ್ವಸತಿ ಕೇಂದ್ರ ತೆರೆಯಲಾಗುತ್ತಿದ್ದು, ಯಾವುದೇ ವ್ಯಸನಕ್ಕೆ ದಾಸರಾದ ಮಕ್ಕಳನ್ನು ದಾಖಲಿಸಿ ಚಿಕಿತ್ಸೆ ಕೊಡಿಸಬಹುದು ಎಂದು ಮಾಹಿತಿ ನೀಡಿದರು.
ಕಾರ್ಯಕ್ರದಲ್ಲಿ ಸಂಸ್ಥೆಯ ವ್ಯವಸ್ಥಾಪಕ ಮಹೇಶ್, ಸಿಬ್ಬಂದಿ ಮಂಜುನಾಥ್, ನಿಶ್ಚಿತಾ, ಆಶಾರಾಣಿ, ರಾಧಿಕಾ, ನೇತ್ರಾವತಿ, ಸಂಜು, ನಂದೀಶ್, ರಾಘು, ಪ್ರದೀಪ್, ರಾಘವೇಂದ್ರ, ಇತರರು ಇದ್ದರು.