ಹಾಸನಾಂಬೆಯ ದರ್ಶನದ ಜೊತೆಗೆ ಪ್ರವಾಸ ಮಾಡಿದ ಸವಿ ಸವಿ ನೆನಪು!

ಹಾಸನಾಂಬ ದೇವಿಯ ದರ್ಶನ"- ಎಂದರೆ ಎಲ್ಲಿಲ್ಲದ ಸಡಗರ ನಮಗೆ!. ಏಕೆಂದರೆ ಅದು ವರ್ಷಕ್ಕೆ ಒಮ್ಮೆ ಮಾತ್ರ ತೆಗೆಯುವ ದೇವಾಲಯ ಆಗಿದೆ. ನಾನು ಕಳೆದ ಹತ್ತು ವರ್ಷಗಳಿಂದಲೂ ಕೂಡ ದೇವಿಯ ದರ್ಶನ ಮಾಡುತ್ತಾ ಬಂದಿರುವೆ. ಕುಟುಂಬದ ಜೊತೆಯಲ್ಲಿಯೂ ಕೂಡ ದೇವಿಯ ದರ್ಶನ ಮಾಡಿದ್ದೇನೆ. ನಮ್ಮ ಸಹೋದರಿಯನ್ನ ಹೊಳೆನರಸೀಪುರಕ್ಕೆ ಮದುವೆ ಮಾಡಿರುವುದರಿಂದ ಅವರು ಈ ಒಂದು ದೀಪಾವಳಿ ಹಬ್ಬಕ್ಕೆ ಮುಂಚಿತವಾಗಿ ದೊಡ್ದ ಹಬ್ಬವನ್ನು ಮಾಡುತ್ತಾರೆ. ಇಂತಹ ಎರಡು ಸಂದರ್ಭದಲ್ಲಿ ನಾವು ಅವರ ಮನೆಯಲ್ಲಿ ಉಳಿದುಕೊಂಡು, ದೇವಿಯ ದರ್ಶನವನ್ನ ಮಾಡಿದ್ದೇವೆ.     
ಏಕೆಂದರೆ ದೇವಿಯ ದರ್ಶನಕ್ಕೆ ಹಲವು ಜಿಲ್ಲೆ, ಅಲ್ಲದೆ ಹೊರರಾಜ್ಯಗಳಿಂದಲೂ ಕೂಡ ಭಕ್ತಾದಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಬರುವುದರಿಂದ ಜನಜಂಗುಳಿ ಇದ್ದೇ ಇರುತ್ತದೆ. ಹೊಳೆನರಸೀಪುರದಿಂದ ಹಾಸನಕ್ಕೆ ಬೆಳಿಗ್ಗೆ ಬೇಗನೆ ಬಂದಿದ್ದರಿಂದ  ದೇವಿಯ ದರ್ಶನ ಬೇಗ ಆಗುತ್ತದೆ.  ಅದರಿಂದಾಗಿ ನಾವು ನಮ್ಮ ಸಹೋದರಿಯ ಮನೆಯಿಂದ ಬೆಳಿಗ್ಗೆ ಬೇಗನೆ ಎದ್ದು ಹಾಸನದ ಕಡೆಗೆ ಪ್ರವಾಸ ಮಾಡುತ್ತಿದ್ದೆವು.  ಇದು ಕುಟುಂಬದ ಜೊತೆಯಲ್ಲಿ ಹೋದಾಗ ವಿಶಿಷ್ಟ ಅನುಭವ!.    
ಆದರೆ ಸ್ನೇಹಿತರ ಜೊತೆಯಲ್ಲಿ ಈ ಹಾಸನಾಂಬ ದೇವಿಯ ದರ್ಶನಕ್ಕೆ ನಾವು ಕೂಡ ಹಲವು ಬಾರಿ ಹೋಗಿದ್ದೇವೆ. ಅಲ್ಲಿ ವರ್ಣಿಸಲಸದಳ ಅನುಭವ ನೀಡುತ್ತದೆ. 
ನಮ್ಮ ರೈಲು ತಂಡದ ಗೆಳೆಯರೆಲ್ಲ ಒಟ್ಟಾಗಿ ಸೇರಿಕೊಂಡು ಪ್ರತಿವರ್ಷ ಹಾಸನದ ಕಡೆಗೆ ದೀಪಾವಳಿಯ ಸಂದರ್ಭದಲ್ಲಿ ಪ್ರವಾಸ ಮಾಡುತ್ತೇವೆ. ಒಂದೊಂದು ವರ್ಷವೂ ಕೂಡ ಒಂದೊಂದು ರೀತಿಯಲ್ಲಿ ನಮಗೆ ಅನುಭವವಾಗುತ್ತದೆ. ಅದರಂತೆ 2025ರ ಈ ಭಾನುವಾರವು  ಕೂಡ ನಮ್ಮ ನಾಲ್ಕೈದು ಜನ ಸ್ನೇಹಿತರ ತಂಡ ಹಾಸನದ ಕಡೆಗೆ ಕಳೆದ ಭಾನುವಾರ ಪ್ರವಾಸ ಮಾಡಿದೆವು.
ಆ ನಮ್ಮ ತಂಡದಲ್ಲಿ ಹಿರಿಯ ಸ್ನೇಹಿತರಾದ ರಾಘವೇಂದ್ರ, ಕುದೇರು ಪರಶಿವಮೂರ್ತಿ, ಗೌರಿಶಂಕರ ರವರ ಜೊತೆಯಲ್ಲಿ ನಾನು ಕೂಡ ಪ್ರವಾಸ ಆರಂಭಿಸಿದೆ. ಮೈಸೂರಿನಿಂದ ಬೆಳಿಗ್ಗೆ ಆರು ಗಂಟೆಗೆ ಹೊರಡುವ "ಮೈಸೂರು- ಶಿವಮೊಗ್ಗ- ತಾಳಗುಪ್ಪ" ರೈಲಿನಲ್ಲಿ ಪ್ರಯಾಣ ಆರಂಭಿಸಿದವು. ನಾವು ಎಲ್ಲೇ ಪ್ರವಾಸ ಕೈಗೊಂಡರು ಕೂಡ ನಮ್ಮ ಜೊತೆಯಲ್ಲಿ ಚಿಕ್ಕದಾದ ಸೌಂಡ್ ಸಿಸ್ಟಮ್ ಇದ್ದೇ ಇರುತ್ತದೆ!!. ಈ ಮೂಲಕ ನಮ್ಮ ಹಾಡುಗಳ ಗಾನ ಲಹರಿ ಪ್ರಾರಂಭವಾಗುತ್ತದೆ!. 
ರೈಲು ಅಥವಾ ಇನ್ನಿತರ ಸ್ಥಳಗಳಲ್ಲಿ ಹಾಡುಗಾರಿಕೆ ನಿಷೇಧ ನಿಜ. ಆದರೆ ಅಲ್ಲಿ ನಾವು ಕುಳಿತುಕೊಂಡಾಗ ಆ ಭೋಗಿಯಲ್ಲಿ ಎಲ್ಲರನ್ನೂ ಕೂಡ ನಾವು ಹಾಡುವ ಬಗ್ಗೆ ತಿಳಿಸಿ, ನಾವು ಹಾಡಿದರೆ ನಿಮಗೆ ಏನು ತೊಂದರೆ ಆಗುವುದಿಲ್ಲವೇ?! ಎಂದು ಅವರಿಂದ ಒಪ್ಪಿಗೆ ಸಿಕ್ಕಿದ ನಂತರ ನಾವು ಹಾಡುಗಳನ್ನು ಹಾಡಲು ಪ್ರಾರಂಭಿಸುತ್ತೇವೆ!. 
ಇಂತಹ ಸಂದರ್ಭದಲ್ಲಿ ಕೆಲವರು ಏನು ಇಷ್ಟೊಂದು ಸೌಂಡ್ ಎಂದು ಹೇಳಿದ್ದು ಉಂಟು! ನಮ್ಮ ತಂಡವೇ ಪ್ರಸ್ತುತಪಡಿಸುತಿದ್ದ ಏಳೆಂಟು ಹಾಡುಗಳನ್ನು ದೂರದಲೆಲ್ಲೋ ಕುಳಿತು ನಮ್ಮ ಗಾನ ಲಹರಿಯನ್ನು ಕೇಳುತ್ತಿದ್ದ ಅನೇಕ ಉದಾಹರಣೆಗಳು ಕೂಡಾ ಇವೆ!.  ಜೊತೆಗೆ ರೈಲಿನಲ್ಲಿ ನಾವು ಪ್ರಯಾಣ ಮಾಡುವಾಗ ಮೈಸೂರಿನಿಂದ ಹಾಸನ ಬಂದಿದ್ದೆ ಗೊತ್ತಾಗುತ್ತಿರಲಿಲ್ಲ. ನಮ್ಮ ಭೋಗಿಯ ಅಕ್ಕಪಕ್ಕದ ಪ್ರಯಾಣಿಕರು ಸರ್ ನೀವು ಇಲ್ಲೇ ಇಳಿದು ಬಿಡುತ್ತಿದ್ದೀರಿ, ಮುಂದಿನ ಊರಿನವರೆಗೂ ಬಂದಿದ್ದರೆ ಚೆನ್ನಾಗಿರುತ್ತಿತ್ತು ಎಂದು ಹೇಳಿದವರೇ ಹೆಚ್ಚು!. ಏನು ಮಾಡುವುದು? ನಮ್ಮ ನಮ್ಮ ನಿಲ್ದಾಣ ಬಂದಾಗ ನಾವು ನಾವು ಇಳಿದುಕೊಳ್ಳಲೇಬೇಕು!. 
ಹಾಸನವನ್ನು ನಾವು ಬೆಳಿಗ್ಗೆ 8:20ಕ್ಕೆ ತಲುಪಿದೆವು. ಅಲ್ಲಿ ಆಟೋ ಮೂಲಕ ದೇವಸ್ಥಾನದ ಬಳಿಗೆ ಬಂದೆವು. 300 ರೂ ಕೌಂಟರ್ ನ ಕಮಾನಿನ ಮುಂದೆ ಇದ್ದ ಸರ್ಕಲ್ ಪಕ್ಕದಲ್ಲಿಯೇ ಇದ್ದ ಸನ್ಮಾನ ಹೋಟೆಲ್ ನಲ್ಲಿ ಬಿಸಿ ಬಿಸಿ ಇಡ್ಲಿ, ಕೊಡೆ ಕಾಫಿ ಸವಿದೆವು. ಅದೇ ಹೋಟೆಲ್ ಏಕೆ ಎಂದರೆ ಕಳೆದ ಬಾರಿ ನಮ್ಮ ಪತ್ರಕರ್ತ ಸ್ನೇಹಿತರಾದ ಹಾಸನದ  "ಸಿಂಹ ಧ್ವನಿ" ಪತ್ರಿಕೆಯ ಸಂಪಾದಕರು ನಮ್ಮ ತಂಡಕ್ಕೆಲ್ಲ ಕಾಫಿ ಕೊಡಿಸಿ ತಮ್ಮ ಪತ್ರಿಕಾ ಕಚೇರಿಗೆ ಕರೆದುಕೊಂಡು ಹೋಗಿದ್ದರು.  ಅವರನ್ನು ಕೂಡ ಆ ದಿನ ಸಂಪರ್ಕ ಮಾಡಿದೆವು, ಅವರು ಈ ದಿನ ನಾನು ಊರಿನಲ್ಲಿ ಇಲ್ಲ ಎಂದ ನಂತರ ಮತ್ತೆ ನಮ್ಮ ಪಯಣ 300 ಕೌಂಟರ್ ಗಳಿಗೆ ಸಾಗಿತು. ಸ್ವಲ್ಪ ದೂರ ನಡೆದ ನಂತರ ಅಲ್ಲಿ ಸುಸಜ್ಜಿತವಾದ, ವಿಶಾಲವಾದ ಹೆಚ್ಚಿನ ಕೌಂಟರ್ಗಳು ಇದ್ದ ಸ್ಥಳ ಸಿಕ್ಕಿತು. ಅಲ್ಲಿ ನಾವು ಪಡೆದಿರುವ ಅಥವಾ ಹೊಸದಾಗಿ ಟಿಕೆಟ್ ಖರೀದಿಸುವ ಎಲ್ಲಾ ಟಿಕೆಟ್ ಗಳನ್ನು ಅಲ್ಲಿ ಸ್ಕ್ಯಾನ್ ಮಾಡಲಾಯಿತು. ಇದರಿಂದಾಗಿ ಒಂದು ದಿನದಲ್ಲಿ ಎಷ್ಟು ಭಕ್ತರು ದೇವಾಲಯಕ್ಕೆ ಬಂದಿದ್ದಾರೆ, ಜೊತೆಗೆ ಎಷ್ಟು ಮೊತ್ತ ಸಂಗ್ರಹವಾಗಿದೆ ಎಂಬುದರ ನಿಖರ ಮಾಹಿತಿ ಲಭ್ಯವಾಗುತ್ತಿತ್ತು. 
ಒಂದು ರೀತಿಯಲ್ಲಿ ಹಾಸನ ಜಿಲ್ಲಾಧಿಕಾರಿಯವರು ನೀಡಿರುವ ಅಂಕಿ ಅಂಶದಂತೆ ಒಂದು ವಾರದಲ್ಲಿ ಹತ್ತು ಕೋಟಿಗೂ ಹೆಚ್ಚು ಆದಾಯ ಸಂಗ್ರಹವಾಯಿತು. ಲಕ್ಷಾಂತರ ಭಕ್ತರು ಆಗಮಿಸಿದ್ದರು ಎನ್ನುವುದು ವಿಶೇಷ. ನಾವು ಟಿಕೆಟ್ ಪಡೆದು ಸರತಿಯ ಸಾಲಿನಲ್ಲಿ ನಿಂತೆವು.  
ವಿಶಾಲವಾದ ಪೆಂಡಲ್ ಅಲ್ಲಿ ನಾಲ್ಕೈದು ಲೈನ್ ನ ಬ್ಯಾರಿಕೇಡ್ ಹಾಕಲಾಗಿತ್ತು.  ಮತ್ತು ನೆಲಹಾಸು ಹಾಕಿದ್ದರಿಂದ ನಾವು ಸರತಿಯ ಸಾಲಿನಲ್ಲಿ ಸುಲಭವಾಗಿ ಸಂಚರಿಸುವ ವ್ಯವಸ್ಥೆಯನ್ನು ಈ ಬಾರಿಯ ಜಿಲ್ಲಾಡಳಿತ ಅಚ್ಚುಕಟ್ಟಾಗಿ ಮಾಡಲಾಗಿತ್ತು. ಕಳೆದ ಬಾರಿಗೆ ಹೋಲಿಸಿಕೊಂಡರೆ ಇದು ಅತ್ಯುತ್ತಮ ವ್ಯವಸ್ಥೆ ಆಗಿತ್ತು. ಸಾಲುಗಳ ಅನೇಕ ಕಡೆ ಅಂಚಿನಲ್ಲಿ ಟೆಂಡರ್ ಪಡೆದಿರುವ ಕೆಲವು ಮಾರಾಟಗಾರರು ಕೂಡ ಇದ್ದರು. ಅಲ್ಲಿ ಮಕ್ಕಳು ಅಥವಾ ವಯಸ್ಸಾದವರಿಗೆ ಬೇಕಾಗುವ ಸೌತೆಕಾಯಿ, ಬಿಸ್ಕೆಟ್, ಚಾಕೊಲೇಟ್, ಚುರುಮುರಿ, ಕಾರಾಪುರಿ ಇನ್ನಿತರ ಆಹಾರ ಪದಾರ್ಥಗಳು ಕೂಡ  ಇದ್ದುದರಿಂದ ನಾವು ತಾತ್ಕಾಲಿಕವಾಗಿ ನಮ್ಮ ದಣಿವನ್ನು ನಿವಾರಿಸಿಕೊಳ್ಳಬಹುದಾಗಿತ್ತು. ಇನ್ನು ಮುಂದುವರೆದು ಮಧ್ಯ ಮಧ್ಯ ಕುಡಿಯುವ ನೀರಿನ ವ್ಯವಸ್ಥೆಯನ್ನು, ಶೌಚಾಲಯ ವ್ಯವಸ್ಥೆಯನ್ನು ಕೂಡ ವ್ಯವಸ್ಥಿತವಾಗಿ ಮಾಡಲಾಗಿತ್ತು. ಇಲ್ಲಿ ಮುಖ್ಯವಾಗಿ ಗಮನಿಸಬೇಕಾಗಿದ್ದ ಅಂಶ ಜೊತೆಗೆ ಸ್ವಚ್ಛತೆಯಬಗ್ಗೆ, ಜೇಬುಗಳ್ಳರು, ಸರಗಳ್ಳರು ಇರುವ ಬಗ್ಗೆ ಎಚ್ಚರಿಕೆ ಸಂದೇಶ ಇರುವ ಫ್ಲೆಕ್ಸ್ ಕೂಡ ಕಾಣಿಸುತ್ತಿತ್ತು. ಸ್ವಯಂಸೇವಕರು ಕೂಡ ನಾವು ವೇಗವಾಗಿ ಚಲಿಸಲು ತಿಳಿಸುತ್ತಿದ್ದರು. ಒಂದೇ ಕಡೆ ಕಳೆದ ಬಾರಿಯಂತೆ ನಿಲ್ಲುತ್ತಿರಲಿಲ್ಲ ಎನ್ನುವುದು ಮತ್ತೊಂದು ವಿಶೇಷ!. ಏಕೆಂದರೆ ನಿಧಾನಗತಿಯಲ್ಲಿ ನೆರಳಿನಲ್ಲಿ ದೇವಿಯ ಕಡೆ ಸಾಗುತ್ತಿತ್ತು. ಇನ್ನೇನು ಕೆಲವೇ ನಿಮಿಷಗಳಲ್ಲಿ ದೇವಿಯ ದರ್ಶನ ಸಿಗುತ್ತದೆ ಎನ್ನುವ ಸಂದರ್ಭದಲ್ಲಿ ಏನೋ ಒಂದು ರೀತಿಯಲ್ಲಿ ರೋಮಾಂಚನ ಅನುಭವ!. ಏಕೆಂದರೆ ನಾವು ನೇರದರ್ಶನ ಮಾಡುವುದಕ್ಕಿಂತ ಈ ರೀತಿ ಸರತಿಯ ಸಾಲಿನಲ್ಲಿ ದೇವಿಯ ದರ್ಶನ ಮಾಡುವುದೇ ಒಂದು ರೀತಿಯಲ್ಲಿ ವಿಶಿಷ್ಟ ಅನುಭವ ಎನ್ನುವುದು ನಮ್ಮಗಳ ಭಾವನೆ. 
ಹಾಸನಾಂಬೆ ದೇವಿಯ ಬಾಗಿಲಿನ ಪ್ರವೇಶ ಮಾಡಿದ ನಂತರ ಅಲ್ಲಿ ಎಂದಿನಂತೆ ಅನೇಕ ಚಿಕ್ಕ ಚಿಕ್ಕ ದೇವಸ್ಥಾನಗಳು, ಜೊತೆಗೆ ಶ್ರೀ ಸಿದ್ದೇಶ್ವರ ಸ್ವಾಮಿ ದೇವರ ದರ್ಶನವಾಯಿತು. ಜೊತೆಗೆ ಹೂವಿನಿಂದ ಅಲಂಕೃತ ಮಾಡಿರುವ ಸಿಂಗಾರಗಳ ದರ್ಶನವಾಯಿತು. ಅದರಲ್ಲು ಶಿವನ ಲಿಂಗ, ಸರ್ಪ, ಕಳಸ, ಗಣೇಶನ ಚಿತ್ರಗಳು ಕಣ್ಮನ ಸೆಳೆದವು. ಜೊತೆಗೆ ದೇವಸ್ಥಾನದ ಸುತ್ತ ವರ್ಣರಂಗಿತ ಹೂವಿನಿಂದ ಅಲಂಕಾರ ಮಾಡಿದ್ದಾರೆ.
ಜೊತೆಗೆ ಸೌಂಡ್ ಸಿಸ್ಟಮ್ ಮೂಲಕ ಆಯಾ ದಿನದ ದರ್ಶನದ ವಿಶೇಷತೆ, ಜೊತೆಗೆ ಯಾವ ಯಾವ ಸಮಯದಲ್ಲಿ ದರ್ಶನವನ್ನು ನಿಷೇಧಿಸಲಾಗಿದೆ ಎನ್ನುವುದರ ವಿವರಗಳನ್ನು ಕೂಡ ನೀಡುತ್ತಿದ್ದರು.
ಇದು ಮುಂದಿನ ಸಮಯದಲ್ಲಿ ಬರುವ ಭಕ್ತಾದಿಗಳಿಗೆ ಅನುಕೂಲವಾಗುತಿತ್ತು. ಹಾಸನಾಂಬ ದೇವಿಯ ದರ್ಶನ ಇನ್ನೇನು ಕೆಲವೇ ನಿಮಿಷ ಇನ್ನುವಾಗಲೂ ಕೂಡ ಒಂದು ರೀತಿಯಲ್ಲಿ ನಮ್ಮಲ್ಲಿ ಭಕ್ತಿ- ಭಾವ ಮನೆ ಮಾಡಿತು. ಇನ್ನು ದೇವಿ ದರ್ಶನ ಮುಂದಿನ ವರ್ಷ ಎಂದು ಇರುವುದರಿಂದ.
ಹಾಸನದಲ್ಲಿ ತನ್ನದೇ ಆದ ಇತಿಹಾಸ ಹೊಂದಿರುವ ಈ ದೇವಿಯ ಮಹತ್ವ ಎಲ್ಲದರ ಬಗ್ಗೆ ಪ್ರಾರಂಭದಿಂದಲೇ ಆಕಾಶವಾಣಿಯ ಮೂಲಕ, ದೂರದರ್ಶನದ ಮೂಲಕ, ಪತ್ರಿಕೆಗಳ ಮೂಲಕ ಹಾಸನದ ಜಿಲ್ಲಾಡಳಿತ ಸುಗಮ ವ್ಯವಸ್ಥೆಯನ್ನು ಮಾಹಿತಿಯನ್ನು ಮಾಡಲಾಗಿದ್ದರಿಂದ ದೇವಿಯ ದರ್ಶನ ಸುಂದರವಾಗಿತ್ತು. ದೇವಿಯ ದರ್ಶನ ನಂತರ ಪ್ರಸಾದ ವ್ಯವಸ್ಥೆಯು ಇದ್ದುದರಿಂದ ಭಕ್ತರಲ್ಲಿ ಒಂದು ರೀತಿಯ ರೋಮಾಂಚನದ ಅನುಭವ.
ಜೊತೆಗೆ ಈ ಒಂದು ದೇವಿಯ ಉತ್ಸವ ದಿಂದ ಹಾಸನ ಸಿಂಗಾರಗೊಂಡಿತ್ತು. ಜೊತೆಗೆ ಪಟ್ಟಣವು ಕೂಡ ಸ್ವಚ್ಛತೆಯಿಂದ ಇತ್ತು. ಅನೇಕ ಶಾಲಾ ಕಾಲೇಜುಗಳ ಎನ್‌ಸಿಸಿ ಮತ್ತು ಎನ್ಎಸ್ಎಸ್ ಮಕ್ಕಳು ಜೊತೆಗೆ ಅಧಿಕಾರಿಗಳು ಯಶಸ್ಸಿಗೆ ಕೈಜೋಡಿಸಿದ್ದರು.
ಜೊತೆಗೆ ರಾತ್ರಿ ಆಯ್ತಂದರೆ ರಸ್ತೆಯ ಎರಡು ಕಡೆಯಲ್ಲೂ ಕೂಡ ವಿದ್ಯುತ್ ದೀಪಗಳ ವರ್ಣ ರಂಜಿತ ಸಿಂಗಾರ ನೋಡಲು ಎರಡು ಕಣ್ಣು ಸಾಲದು!. ಜೊತೆಗೆ ಹೂವಿನಿಂದ ಅಲಂಕಾರ ಕೂಡಾ ಮನಸ್ಸಿಗೆ ಮುದ ನೀಡುತ್ತಿತ್ತು. ಅದರಲ್ಲೂ ಕೂಡ ಹಾಸನದ ಜಿಲ್ಲಾಡಳಿತದ ವತಿಯಿಂದ ಫಲ ಪುಷ್ಪ ಪ್ರದರ್ಶನವನ್ನು ಕೂಡ ಹಮ್ಮಿಕೊಳ್ಳಲಾಗಿತ್ತು. ಸುತ್ತಮುತ್ತಲಿನ ಪ್ರವಾಸ ಮಾಡಲು ಕೂಡ ವಿಶೇಷ ಪ್ಯಾಕೇಜ್ ವ್ಯವಸ್ಥೆಯನ್ನು ಕೂಡ ಮಾಡಲಾಗಿತ್ತು.
ಒಟ್ಟಿನಲ್ಲಿ ಈ ಹಾಸನದ ನಮ್ಮ ಪ್ರಯಾಣ ಯಶಸ್ವಿಯಾಗಿ ಮುಗಿಯಿತು. ನಾವು ಈ ಸಂದರ್ಭದಲ್ಲಿ ತೆಗೆದ ಫೋಟೋಗಳು, ವಿಡಿಯೋ ಎಲ್ಲವನ್ನು ನಮ್ಮ ಇನ್ನಿತರ ಬಳಗಕ್ಕೆ ಹಾಕಿದೆವು. ಅವರು ಇದನ್ನೆಲ್ಲವನ್ನು ನೋಡಿ ನಾನು ಕೂಡ ಬರಬೇಕಾಗಿತ್ತು ಮಿಸ್ ಮಾಡಿಕೊಂಡೆ ಎನ್ನುವ ಭಾವವನ್ನ ವ್ಯಕ್ತಪಡಿಸಿದರು. ನಾವು ಸಮಯ ಸಿಗುವುದಿಲ್ಲ ಎಂದು ಕುಳಿತರೆ ಸಮಯ ಸಿಗುವುದೇ ಇಲ್ಲ!. ಸಮಯ…. ಅದು ಯಾರನ್ನು ಕೂಡ ಕಾಯುವುದಿಲ್ಲ. ನಿರಂತರವಾಗಿ ಕಾಲದ ಹಕ್ಕಿ ಸಾಗುತ್ತಲೇ ಇರುತ್ತದೆ. ನಾವು ಸ್ವಲ್ಪ ಸಮಯವನ್ನು ಮಾಡಿಕೊಳ್ಳಬೇಕು. ಅಷ್ಟೇ, ಆ ಒಂದು ಸಿಕ್ಕ ಸಮಯದಲ್ಲಿ ಈ ರೀತಿಯ ಒಂದು ಚಿಕ್ಕದಾದ ಪ್ರವಾಸವನ್ನು ಮಾಡಿ ಮುಗಿಸಬೇಕು. ನಾವು ಮತ್ತೊಂದು ವರ್ಷ ಹೋಗುತ್ತೇವೆ ಎಂದು ಕೂತರೆ ಆ ವರ್ಷದಲ್ಲಿ ಮತ್ತೆ ಇನ್ನೇನೋ ಕೆಲಸ ಇರುತ್ತದೆ. ನನ್ನ ಸ್ನೇಹಿತನು ವರ್ಷ ವರ್ಷವೂ ಕರೆದಾಗಲೆಲ್ಲ ಮುಂದಿನ ಬಾರಿ ಬರುತ್ತೇನೆ… ಮುಂದಿನ ಬಾರಿ ಬರುತ್ತೇನೆ…. ಎಂದುಕೊಂಡು ಕಳೆದ ಏಳೆಂಟು ವರ್ಷಗಳಿಂದಲೂ ಕೂಡ ದೇವಿಯ ದರ್ಶನಕ್ಕೆ ಬಂದಿರುವುದಿಲ್ಲ. ಮುಂದಿನ ಬಾರಿ ಬಂದೇ ಬರುತ್ತೇನೆ ಎಂದು ತಿಳಿಸಿದ್ದಾನೆ. ನೋಡೋಣ.
ಈ ದೇವಿಯ ದರ್ಶನದ ನೆಪದಲ್ಲಿ ಚಿಕ್ಕದಾದ ಪ್ರವಾಸವು ಕೂಡ ಆಯಿತು. ಮತ್ತೆ ಟ್ರೈನಿನಲ್ಲಿ ಬಂದು "ಅದೇ ರಾಗ ಅದೇ ಹಾಡು"- ಎನ್ನುವಂತೆ ಮತ್ತೆ ನಮ್ಮ ಹಾಡುಗಳ ಗಾನ ಲಹರಿ ಪ್ರಾರಂಭವಾಯಿತು!. ಮೈಸೂರು ಬಂದಿದ್ದೇ ಗೊತ್ತಾಗಲಿಲ್ಲ.
ನಾವು ಮೈಸೂರಿನಿಂದ ಹಾಸನಕ್ಕೆ ಬಂದಾಗ ಯಾವ ರೀತಿಯ ಪ್ರೋತ್ಸಾಹ ಸಿಕ್ಕಿತ್ತೋ ಅದೇ ರೀತಿಯ ಪ್ರೋತ್ಸಾಹ ಸಿಕ್ಕಿತು. ಮತ್ತೆ ಮತ್ತೆ ಹಾಸನಾಂಬೆಯ ಚಿತ್ರಣ ನೆನಪಾಯಿತು.
ನಮ್ಮ ನವಗಾನ ಮಿಲನ ಟ್ರಸ್ಟ್ ನ ಸದಸ್ಯರ ಪ್ರವಾಸ ಪ್ರಯಾಸ ಆಗದೆ, ಲವಲವಿಕೆಯಿಂದ ಕಾಲ ಕಳೆದು ಬಂದೆವು. ಕಚೇರಿ ಕೆಲಸ, ಕುಟುಂಬ ಇವೆಲ್ಲದರ ಜೊತೆಗೆ ನಮ್ಮ ಮನಸ್ಸು ಸಾಗಿತು.

ಕಾಳಿಹುಂಡಿ ಶಿವಕುಮಾರ್ ಮೈಸೂರು.