ಭಾರತೀಯ ಪರಂಪರೆಯಲ್ಲಿ ಹಬ್ಬಗಳು ಬಹು ಮುಖ್ಯ ಪಾತ್ರ ವಹಿಸುತ್ತವೆ. ವರ್ಷಪೂರ್ತಿ ಒಂದಲ್ಲ ಒಂದು ರೀತಿಯ ಹಬ್ಬಗಳು ವಿವಿಧತೆಯಲ್ಲಿ ಏಕತೆಯನ್ನು ಸಾರುತ್ತವೆ. ಎಲ್ಲರನ್ನು ಒಟ್ಟುಗೂಡಿಸುತ್ತವೆ. ಎಲ್ಲರೂ ಕೂಡ ಸೇರಿ ಸಡಗರ ಸಂಭ್ರಮದಿಂದ ಆಯಾ ಪ್ರಾಂತ್ಯಕ್ಕೆ ಸಂಬಂಧಿಸಿದಂತೆ ಊಟ ಮಾಡಿ, ದಾನ ಕೊಟ್ಟು, ಭಕ್ತಿ- ಭಾವದೊಂದಿಗೆ, ಸಂಭ್ರಮಿಸುವುದು ಆಗಿದೆ.
ಹಬ್ಬ" ಎಂದರೆ ಸಾಕು ನಮಗೆ ಮೈ-ಮನಗಳು ರೋಮಾಂಚನಗೊಳ್ಳುತ್ತವೆ!. ಹಬ್ಬ ಎಂದರೆ ಕೇವಲ ಆಚರಣೆ ಅಷ್ಟೇ ಅಲ್ಲದೆ, ಎಲ್ಲರಿಗೂ ಒಳಿತಾಗಲಿ ಎಂದು ಒಟ್ಟಾಗಿ ಸೇರುವ, ಆಚರಿಸುವ ಪ್ರಮುಖ ಹಬ್ಬ ಈ "ದೀಪಾವಳಿ".
ಹಬ್ಬಗಳ ರಾಜ ಈ "ದೀಪಾವಳಿ"!.
ಬೆಳಕಿನ ಹಬ್ಬ ದೀಪಾವಳಿಯನ್ನು "ಹಬ್ಬಗಳ ರಾಜ" ಎಂದು ಕರೆಯುತ್ತಾರೆ. ಏಕೆಂದರೆ ಎಲ್ಲಾ ಹಬ್ಬಗಳಿಗಿಂತಲೂ ಕೂಡ ಈ ದೀಪಾವಳಿ ಹಬ್ಬ ಒಂದು ಹೆಜ್ಜೆ ಮುಂದೆ ಇದೆ.
ಹಿಂದೂಗಳಿಗೆ ಸಂಪ್ರದಾಯ ಬದ್ಧ ಹಬ್ಬ ದೀಪಾವಳಿಯನ್ನು ಬೆಳಕಿನ ಹಬ್ಬ, ನೀರು ತುಂಬುವ ಹಬ್ಬ, ಎಂಬಿತ್ಯಾದಿ ಹೆಸರುಗಳಿಂದ ಕರೆಯುತ್ತಾರೆ. ಯಾವುದೇ ಪ್ರಾಂತ್ಯ ಭೇದವಿಲ್ಲದೆ ಹಬ್ಬವನ್ನು ಆಚರಿಸುತ್ತಾರೆ.
ಅಜ್ಞಾನ" ಎಂಬ ಕತ್ತಲೆಯನ್ನು ಕಳೆದು "ಸುಜ್ಞಾನ" ಎಂಬ ಜ್ಯೋತಿಯ "ಬೆಳಗು" ಎಲ್ಲರ ಮನೆ- ಮನ ತುಂಬಲಿ ಎಂದು ಈ ಹಬ್ಬ ಸಂದೇಶ ಸಾರುತ್ತದೆ.
ಆಬಾಲವೃದ್ಧರಾದಿಯಾಗಿ ಎಲ್ಲರೂ ಕೂಡ ಸೇರಿ ಆಚರಿಸುವ ಹಬ್ಬ ದೀಪಾವಳಿಯಾಗಿದೆ. ಮಕ್ಕಳು, ದೊಡ್ಡವರು ಎಲ್ಲರೂ ಕೂಡ ಅಭ್ಯಂಜನ ಸ್ಥಾನ ಮಾಡಿ, ಹೊಸ ಬಟ್ಟೆ ಧರಿಸಿ, ತಿಂಡಿ ತಿನಿಸು ತಿಂದು, ಪಟಾಕಿ ಹಚ್ಚಿ, ಸಂಭ್ರಮಿಸುವ ಹಬ್ಬ ಇದಾಗಿದೆ.
ಜ್ಯೋತಿಯಿಂದ ಜ್ಯೋತಿ ಬೆಳಗಿಸುವ ಹಬ್ಬ ಇದು. ಅಲ್ಲದೆ ಆ ಜ್ಯೋತಿಯ ಬೆಳಕು ಎಲ್ಲರ ಬಾಳಿನಲ್ಲೂ ಕೂಡ ಬೆಳಗಲಿ ಎಂಬುದೇ ಸಂದೇಶ. ಸಾಮಾನ್ಯವಾಗಿ ಇಂದಿಗೂ ಕೂಡ ಮನೆಯ ಕಿಟಕಿ, ಬಾಗಿಲು, ಮನೆಯ ಮುಂದೆ, ಮನೆಯ ಹಿಂದೆ, ಜೊತೆಗೆ ಹಿತ್ತಲು ಕಡೆ, ಎಲ್ಲಾ ಕಡೆ ದೀಪ ಹಚ್ಚಿ ಸಂಭ್ರಮಿಸುತ್ತಾರೆ.
ಇವತ್ತಿಗೂ ಕೂಡ ಗ್ರಾಮೀಣ ಪ್ರದೇಶದಲ್ಲಿ ಶುದ್ಧ ಹತ್ತಿಯಿಂದ ತೆಗೆದ ಬತ್ತಿ, ಹರಳೆಣ್ಣೆ, ಜೊತೆಗೆ ಮಣ್ಣಿನಿಂದ ಮಾಡಿದ ದೀಪಗಳೊಂದಿಗೆ ಆಚರಿಸುವ ಹಬ್ಬ ಇಂದಿಗೂ ಕಣ್ಣಿಗೆ ಕಟ್ಟುವಂತೆ.
ಇದೇ ದಿನ ದುಷ್ಟ ಶಕ್ತಿಗಳ ವಿರುದ್ಧ ವಿಜಯಕ್ಕೆ ಸಾಕ್ಷಿಯಾದ ಹಬ್ಬದಂದು ಶ್ರೀ ರಾಮನು ಅಯೋಧ್ಯೆಗೆ ಆಗಮಿಸಿದ ದಿನ ದೀಪಾವಳಿಯಾಗಿದೆ. ಸಂಪತ್ತಿನ ಅಧಿದೇವತೆ ಲಕ್ಷ್ಮಿ ಪೂಜೆ ಮಾಡುವ ಹಬ್ಬ ಆಗಿದೆ. ಜೊತೆಗೆ ಮಹಾವೀರರು ನಿರ್ವಾಣ ಮಾಡಿದ ದಿನ ದೀಪಾವಳಿಯಾಗಿದೆ. ಸಾಂಸ್ಕೃತಿಕ ಆಚರಣೆ ಆದರೂ ಕೂಡ ಬೆಳಕಿನ ಮಹತ್ವ ಇದು ಹೆಚ್ಚಾಗಿ ಸಾರುತ್ತದೆ.
ಐದು ದಿನ ಆಚರಣೆಯ ಮಹತ್ವ ಸಾರುವ ದೀಪಾವಳಿ ಹಬ್ಬ.ಐದು ದಿನ ಆಚರಿಸುವ ಹಬ್ಬ ಈ ದೀಪಾವಳಿಯಾಗಿದೆ. ಇದು ತನ್ನದೇ ಆದ ಪೌರಾಣಿಕ ಹಿನ್ನೆಲೆಯನ್ನು ಮಹತ್ವವನ್ನು ಹೊಂದಿದೆ. ಅಶ್ವಿನಿ ಮಾಸ ಕೃಷ್ಣ ಪಕ್ಷ ದ್ವಾದಶಿಯಿಂದ ಆರಂಭವಾಗಿ, ಕಾರ್ತಿಕ ಶುದ್ಧ ಪಂಚಮಿಯವರೆಗೂ ಕೂಡ ಈ ಹಬ್ಬವನ್ನು ಆಚರಿಸುತ್ತಾರೆ.
ಮೊದಲ ದಿನ....... ಅಂದರೆ ದ್ವಾದಶಿ ದಿನ ಸಂಭ್ರಮದಿಂದ ಹಾಲು ಕೊಡುವ ಆಕಳನ್ನು ಭಯ-ಭಕ್ತಿಯಿಂದ ಪೂಜಿಸುತ್ತಾರೆ.
ಎರಡನೆಯ ದಿನ...... ನೀರು ತುಂಬುವ ಹಬ್ಬ. ಈ ದಿನ ಮನೆಯಲ್ಲಿ ಎಲ್ಲರೂ ಕೂಡ ಪಾತ್ರೆಗಳಿಗೆಲ್ಲ ನೀರು ತುಂಬಿ, ಗಂಗೆಗೆ ಪೂಜೆ ಮಾಡುತ್ತಾರೆ.
ಮೂರನೇ ದಿನ....... ನರಕ ಚತುರ್ದಶಿ. ಈ ದೀಪಾವಳಿ ದಿನ ಶ್ರೀ ಕೃಷ್ಣನು ನರಕಾಸುರ ಎಂಬ ರಾಕ್ಷಸನನ್ನು ಕೊಂದು ದುಷ್ಟನನ್ನು ಸಂಹಾರ ಮಾಡುತ್ತಾನೆ. ನಂತರ ಮನೆಗೆ ಹೋದಾಗ ರುಕ್ಮಿಣಿ ಅತ್ಯಂತ ಸಂತೋಷದಿಂದ ಆರತಿ ಎತ್ತಿ, ಎಲ್ಲ ಮುತ್ತೈದೆರೊಂದಿಗೆ ಪೂಜೆ ನೆರವೇರುತ್ತದೆ. ಅದರಿಂದಲೇ ಇವತ್ತಿನವರೆಗೂ ಕೂಡ ಈ ದಿನ ಮಹಿಳೆಯರು ತಮ್ಮ ಮಕ್ಕಳಿಗೆ ಗಂಡನಿಗೆ ಆರತಿ ಎತ್ತಿ ಸಂಪ್ರದಾಯ ಆಚರಣೆ ಮಾಡುತ್ತಾರೆ. "ನರಕ" ಎಂದರೆ: ಕತ್ತಲೆ, ಕಷ್ಟ, ಅಜ್ಞಾನ ಎಂಬರ್ಥ ಬರುತ್ತದೆ. ಅದೇ ರೀತಿ "ಚತುರ್ದಶಿ" ಎಂದರೆ: 14 ವಿದ್ಯೆ ಎಂದು. ಕೃಷ್ಣನು ವಿದ್ಯೆಯನ್ನು ಪ್ರಸಾರ ಮಾಡಿದ ಸುದಿನ ಕೂಡ ಇವತ್ತೇ ಆಗಿದೆ.
ನಾಲ್ಕನೆಯ ದಿನ...... ದೀಪಾವಳಿ ಅಮಾವಾಸ್ಯೆ ಈ ದಿನ ಮನೆಯನ್ನ ಎಲ್ಲಾ ಸಿಂಗರಿಸಿ ಲಕ್ಷ್ಮಿ ಪೂಜೆಯನ್ನು ಮಾಡುತ್ತಾರೆ. ಸಾಲು ಸಾಲು ದೀಪ ಹಚ್ಚುತ್ತಾರೆ.ಐದನೆಯ ದಿನ……….. ಕಾರ್ತಿಕ ಶುದ್ಧ ಪ್ರತಿಪದೆ ಬಲಿಪ್ಯಾಡ್ಡಮಿ
ಪರಮಾತ್ಮ ಶ್ರೀಹರಿ ವಾಮನ ರೂಪ ತಾಳಿ ಪ್ರಹಲ್ಲಾದನ ಮೊಮ್ಮಗ ಬಲಿ ಚಕ್ರವರ್ತಿಯನ್ನು ಬಲಿಪಡೆದ ದಿನ. ಈ ಕಥೆ ಎಲ್ಲರಿಗೂ ಗೊತ್ತೇ ಇದೆ. ಇವತ್ತೇ ಎತ್ತಿನ ಸಗಣಿಯಿಂದ ಪಾಂಡವರ ಮೂರ್ತಿಯನ್ನು ಮಾಡಿ ಕೂಡ ಈ ಐದನೆಯ ದಿನ ಪೂಜೆ ಮಾಡುತ್ತಾರೆ.
ಯಾವುದೇ ಅಡೆತಡೆ ಇಲ್ಲದೆ ಎಲ್ಲರಿಗೂ ಒಳಿತಾಗಲಿ ಎಂಬುದೇ ಇದರ ಉದ್ದೇಶ.
“ದೀಪಾವಳಿ ಹಬ್ಬದ”- ಈ ಐದು ದಿನ ಆಚರಣೆ ಭಾಗವಾಗಿ ಮತ್ತೊಂದು ಮಹತ್ವದ ವಿಷಯವೆಂದರೆ ಬಣ್ಣ ಬಣ್ಣದ ಆಕಾಶಬುಟ್ಟಿ.
ಎಲ್ಲರೂ ಕೂಡ ತಮ್ಮ ತಮ್ಮ ಮನೆಯ ಮುಂದೆ ನಿಂತು ಬಣ್ಣ ಬಣ್ಣದ ಆಕಾಶಬುಟ್ಟಿಯನ್ನು ಆಕಾಶಕ್ಕೆ ತೂಗು ಬಿಡುತ್ತಾರೆ. ದೇವಲೋಕದಲ್ಲಿ ಇರುವ ಹಿರಿಯರಿಗೆ ಅನುಕೂಲವಾಗಲಿ ಎಂಬುದೇ ಆಗಿದೆ.
ಒಟ್ಟಿನಲ್ಲಿ ಪ್ರಾಚೀನ ಕಾಲದಿಂದಲೂ ಇವತ್ತಿನವರೆಗೂ ಕೂಡ ದೀಪಾವಳಿ ಹಬ್ಬ ತನ್ನತನವನ್ನು ಕಾಯ್ದುಕೊಂಡಿದೆ. ಜೊತೆಗೆ ವರ್ಷದಿಂದ ವರ್ಷಕ್ಕೆ ತನ್ನದೇ ಆದ ಸಂಪ್ರದಾಯದೊಂದಿಗೆ…. ಆಚರಣೆಯೊಂದಿಗೆ….. ಮನೆ- ಮನದಲ್ಲಿ ಎಲ್ಲರೂ ಭಯ ಭಕ್ತಿಯಿಂದ ಆಚರಿಸುವ ಹಬ್ಬವೇ ಈ ದೀಪಾವಳಿ.
ಹಬ್ಬದ ಆಚರಣೆಯ ಸಂಭ್ರಮ: ಈ “ದೀಪಾವಳಿ” ಹಬ್ಬ ಬಂತೆಂದರೆ ಸಾಕು ಎಲ್ಲೆಲ್ಲೂ ಸಡಗರ ಸಂಭ್ರಮ ಮನೆ- ಮನ ತುಂಬುತ್ತದೆ. ಒಂದು ಕಡೆ ದೀಪಗಳ ಸಾಲು ಸಾಲು….. ಮತ್ತೊಂದೆಡೆ ಭಾರಿ ಶಬ್ದಗಳೊಂದಿಗೆ ಪಟಾಕಿಗಳ ಕಾರುಬಾರು…. ಇವುಗಳ ಜೊತೆಗೆ ಭಕ್ತಿ- ಭಾವದ ಹಬ್ಬದ ಆಚರಣೆಗೆ ತಯಾರಾಗುವ ದೊಡ್ಡವರು….. ಹೊಸ ಹೊಸ ಬಟ್ಟೆಗಳೊಂದಿಗೆ, ಪಟಾಕಿಗಳ ಕನಸು ಕಾಣುವ ಚಿಕ್ಕವರು….!.
ದೀಪಾವಳಿ ಹಬ್ಬಕ್ಕಾಗಿ ಒಂದು ವಾರ ಮುಂಚಿತವಾಗಿಯೇ ಎಲ್ಲರೂ ಕೂಡ ಒಂದಲ್ಲ ಒಂದು ರೀತಿಯಲ್ಲಿ ತಯಾರಿ ಮಾಡಿಕೊಳ್ಳುತ್ತಾರೆ.
ಅವರವರ ಆರ್ಥಿಕ ಸ್ಥಿತಿಗನುಗುಣವಾಗಿ ಹಬ್ಬಗಳನ್ನು ಆಚರಿಸುತ್ತಾರೆ. ಮತ್ತೂ ಕೆಲವರು “ಸಾಲ ಮಾಡಿ ಯಾದ್ರೂ ತುಪ್ಪ ತಿನ್ನು” ಎನ್ನುವಂತೆ ಹಬ್ಬಕ್ಕಾಗಿ ಸ್ವಲ್ಪ ಸಾಲ ಮಾಡಿ, ಅದ್ದೂರಿಯಾಗಿ ಆಚರಿಸುವವರು ಇದ್ದಾರೆ! ಯಾವುದೇ ಹಬ್ಬಗಳು ಒಂದಲ್ಲಾ ಒಂದು ರೀತಿಯಲ್ಲಿ ಎಲ್ಲರನ್ನು ಒಟ್ಟುಗೂಡಿಸಿ, ಸಂಬಂಧಗಳನ್ನು ಗಟ್ಟಿಗೊಳಿಸಿ, ಒಂದೆಡೆ ಬೆರೆಯುವಂತೆ ಮಾಡುತ್ತವೆ. ಒಟ್ಟು ಕುಟುಂಬದಲ್ಲಿ ಹಬ್ಬಗಳನ್ನು ಆಚರಿಸುವ ಕಲ್ಪನೆಯ ಸೊಗಸು. ಆದರೆ ಈಗ ಒಟ್ಟು ಕುಟುಂಬ ಕಾಣೆಯಾಗುತ್ತಿವೆ. ದೀಪಾವಳಿ ಹಬ್ಬದಲ್ಲಿ ಪಟಾಕಿಗಳದ್ದೇ ಕಾರುಬಾರು!.
ಈ ಬೆಳಕಿನ ದೀಪಾವಳಿ ಮುಖ್ಯವಾಗಿ ಮಕ್ಕಳಿಗೆ ಪಟಾಕಿಗಳೇ ಸರ್ವಸ್ವ ಎನ್ನುವಂತಾಗಿರುತ್ತದೆ!.
“ದೀಪಾವಳಿ” ಹಬ್ಬ ಬಂತೆಂದರೆ ನನಗೆ ನನ್ನ ಬಾಲ್ಯದ ವೈಭವದ ದಿನಗಳು ನೆನಪಾಗುತ್ತದೆ!. ನಾವು ಗೋಲಕ ಡಬ್ಬಿಯಲ್ಲಿ ಕೂಡಿಟ್ಟ ಒಂದಿಷ್ಟು ಬಿಡಿ ಗಾಸುಗಳನ್ನು ನಮ್ಮ ದೊಡ್ಡವರಿಗೆ ನೀಡಿ ಪಟಾಕಿ ತರಲು ಹೇಳುತ್ತಿದ್ದೆವು. ದೊಡ್ಡವರು ಕೂಡ ನಮಗೆ ತಿಳಿಯದಂತೆ ಮೊದಲೇ ಪಟಾಕಿಗಳನ್ನು ತಂದು ಇಡುತ್ತಿದ್ದರು.
ಮೂರು ದಿನ ಆಚರಿಸುವ ಈ ದೀಪಾವಳಿಯಲ್ಲಿ ಮೂರು ರಾತ್ರಿಗಳು ಕೂಡ ಪಟಾಕಿಗಳನ್ನು ಒಂದಲ್ಲ ಒಂದು ರೀತಿಯಲ್ಲಿ ಹೊಡೆಯುತ್ತಿದ್ದೆವು. ಒಮ್ಮೊಮ್ಮೆ ಪಟಾಕಿ ಹೊಡೆಯುವುದರಲ್ಲೂ ಕೂಡ ಪೈಪೋಟಿ ನಡೆಯುತ್ತಿತ್ತು . ಯಾರ ಮನೆಯ ಮುಂದೆ ಹೆಚ್ಚಾಗಿ ಪಟಾಕಿ ಹೊಡೆದ ನಂತರ ಬರುವ ಪೇಪರ್ ಇನ್ನಿತರ ಸಾಮಗ್ರಿಗಳು ಇದ್ದಾಗ ಅವರು ಈ ವರ್ಷ ಹೆಚ್ಚು ಪಟಾಕಿ ಹೊಡೆದಿದ್ದಾರೆ ಎನ್ನುವ ಗತ್ತು ಗಮ್ಮತ್ತು ಕೂಡ ಇರುತ್ತಿತ್ತು!
ಇದರಿಂದಾಗಿ ನಾವು ಒಂದು ರೀತಿಯಲ್ಲಿ ಪೈಪೋಟಿಯುತವಾಗಿ ಪಟಾಕಿಗಳನ್ನು ಹೆಚ್ಚೆಚ್ಚು ಹೊಡೆಯುತ್ತಿದ್ದೆವು.
ಮೊದಲೇ ಹೇಳಿದಂತೆ ದೊಡ್ಡವರು ಪಟಾಕಿ ತಂದು ಮೂರು ದಿನವು ಇಂತಿಷ್ಟೇ ಪಟಾಕಿ ಹೊಡೆಯಬೇಕೆಂದು ಹಂಚುತ್ತಿದ್ದರು. ನಾವುಗಳು ಮಾತ್ರ ಒಂದೇ ರಾತ್ರಿ ಪಟಾಕಿಗಳನ್ನು ಹೊಡೆದು ಮುಂದಿನ ಎರಡು ರಾತ್ರಿಗೆ ಯಾವ ರೀತಿಯಲ್ಲಿ ಪಟಾಕಿ ಹೊಡೆಯುವುದು ಎಂಬ ಯೋಚನೆಯೊಂದಿಗೆ ಲೆಕ್ಕಹಾಕುತ್ತಿದ್ದೆವು!
ಒಮ್ಮೊಮ್ಮೆ ನಮ್ಮ ಸ್ನೇಹಿತರುಗಳಿಂದ…. ಸಹೋದರರುಗಳಿಂದ….. ಪಟಾಕಿಗಳನ್ನು ಕದ್ದಿದ್ದು ಉಂಟು!. ಇವೆಲ್ಲ ನಮಗೆ ಮಾಮೂಲು ಎನ್ನುವಂತಾಗಿತ್ತು!.
ಈಗಲಂತೂ ನಗರ ಪ್ರದೇಶಗಳ ಕಡೆಗೆ ದೊಡ್ಡ ದೊಡ್ಡ ಪಟಾಕಿ ಅಂಗಡಿಗಳಿರುತ್ತವೆ. ನಮಗೆ ಕೈಗೆಟುಕುವ ದರದಿಂದ ಹಿಡಿದು ಅದ್ದೂರಿವರೆಗೂ ಸಹ ಪಟಾಕಿಗಳು ವರ್ಣ ರಂಜಿತವಾಗಿ, ಬಗೆ ಬಗೆಯ ಶಬ್ದಗಳೊಂದಿಗೆ, ಬಗೆ ಬಗೆಯ ಆಕಾರದಲ್ಲಿ ಪಟಾಕಿಗಳು ಸಿಗುತ್ತವೆ, ಜೊತೆಗೆ ಸಿಡಿಯುತ್ತವೆ!.ಪಟಾಕಿ ಹಚ್ಚುವಾಗ ಎಚ್ಚರಿಕೆಯ ಅಗತ್ಯ.
ನಮಗೆ ಪಟಾಕಿಗಳು ಎಂದರೆ ಕೆಲವೇ ಕೆಲವು ಎನ್ನುವಂತಾಗಿತ್ತು. ಅದರಲ್ಲಿಯೂ ಮಕ್ಕಳು ಹೊಡೆಯುವ ಪಟಾಕಿಗಳು, ದೊಡ್ಡವರು ಹೊಡೆಯುವ ಪಟಾಕಿಗಳು ಎಂಬ ಎರಡು ವಿಭಾಗಗಳಿದ್ದವು.
ಮಕ್ಕಳಿಗೆ ಮಾತ್ರ ಸೂರ್ ಸುರ್ ಬತ್ತಿ, ಹೂವಿನ ಕುಡಿಕೆ, ಕೃಷ್ಣಚಕ್ರ, ಚಿನಕುರಳಿ ಪಟಾಕಿ ಜೊತೆ ಇನ್ನೊಂದಿಷ್ಟು ಪಟಾಕಿ. ದೊಡ್ಡವರಿಗೆ ಲಕ್ಷ್ಮಿಪಟಾಕಿ, ಆನೆಪಟಾಕಿ, ಆಟಂ ಬಾಂಬ್ ಮುಂತಾದವು ಇರುತ್ತಿದ್ದವು.
ಮೊದಲು ಚಿಕ್ಕವರು ಎಲ್ಲಾ ಪಟಾಕಿಗಳನ್ನು ಹೊಡೆದ ನಂತರ ಅವರು ಒಂದೆಡೆ ಕೂರಬೇಕಾಗಿತ್ತು. ಏಕೆಂದರೆ ದೊಡ್ಡ ಪಟಾಕಿಗಳನ್ನು ದೊಡ್ಡವರು ಹೊಡೆಯುವಾಗ ಅನಾಹುತವಾಗುತ್ತದೆ ಎನ್ನುವ ಭಯ ಒಂದೆಡೆ ಇದ್ದೇ ಇರುತ್ತಿತ್ತು.
ಮುಖ್ಯವಾಗಿ ದೊಡ್ಡವರು ಮಕ್ಕಳು ಪಟಾಕಿ ಹೊಡೆಯುವಾಗ ಹತ್ತಿರದಲ್ಲೇ ಇದ್ದು ಜಾಗರೂಕತೆ ವಹಿಸುತ್ತಿದ್ದರು.
ನಾವಂತೂ ಯಾವುದೇ ಪಟಾಕಿ ಸಿಡಿತದ ಶಬ್ದಕ್ಕೆ ಅಂಜದೇ, ಅಳುಕದೆ ಬೀದಿ ಬೀದಿ ಸುತ್ತಿ, ಎಲ್ಲೆಲ್ಲಿ ಹೆಚ್ಚೆಚ್ಚು ಪಟಾಕಿ ಹೊಡೆಯುತ್ತಾರೋ ಅಲ್ಲಿ ನಿಂತು ಪಟಾಕಿಗಳನ್ನು ಹೊಡೆಯುವುದನ್ನು ದೂರದಿಂದ ನೋಡಿ ಸಂಭ್ರಮ ಪಡುತ್ತಿದ್ದೆವು!.
ನಂತರ ತಡವಾಗಿ ಮನೆಗೆ ಬಂದು ಬೈಸಿಕೊಂಡಿದ್ದು ಉಂಟು!!. ನಮ್ಮ ಸ್ನೇಹಿತರುಗಳು….. ಅಕ್ಕಪಕ್ಕದ ಮನೆಯವರು….. ತಾವು ತಂದಿದ್ದ ಹೆಚ್ಚೆಚ್ಚು ಪಟಾಕಿಗಳನ್ನು ಹೊಡೆಯುವಾಗ ನಮ್ಮಗಳನ್ನು ಕೂಡ ಕರೆಯುತ್ತಿದ್ದರು. ನಮಗೊಂದಷ್ಟು ಪಟಾಕಿಗಳನ್ನು ಕೊಡುತ್ತಿದ್ದರು.
ಚಿಕ್ಕ ಚಿಕ್ಕ ಪೊಟ್ಟಣಗಳಲ್ಲಿ ಚಿನಕುರಳಿ ಪಟಾಕಿಗಳು ಇರುತ್ತಿದ್ದವು. ಅವನ್ನೆಲ್ಲ ಕೆಲವರು ಕೈಯಲ್ಲೇ ನೆಲಕ್ಕೆ ಅಥವಾ ಗೋಡೆಗೆ ಉಜ್ಜುವುದರ ಮೂಲಕ ಪಟ್ ಎನ್ನುವ ಶಬ್ದ ಬರುವಂತೆ ಮಾಡುತ್ತಿದ್ದೆವು. ಬರು ಬರುತ್ತಾ ಅದೇ ಚಿನಕುರುಳಿ ಪಟಾಕಿ ಟೇಪ್ಗಳ ಮೂಲಕ ಬಂದು ಅವನ್ನು ಗನ್ ಗಳಿಗೆ ಹಾಕಿಕೊಂಡು ಪಟ್ಪಟ್… ಪಟ್ ಪಟ್ ಪಟ್ ಎನ್ನುವ ರೀತಿಯ ಶಬ್ದವು ಕೂಡ ನಮಗೆ ಆನಂದ ನೀಡುತ್ತಿತ್ತು.ಚಲನಚಿತ್ರಗಳನ್ನು ಕೂಡ ಪಟಾಕಿಯ ಚಿತ್ರಣ.
ಈ ಪಟಾಕಿ ಹೊಡೆಯುವ ಸಂಭ್ರಮವು ಅನೇಕ ಚಲನಚಿತ್ರಗಳಲ್ಲಿ ಕೂಡ ನಾವು ನೋಡಿದ್ದೇವೆ. ಹಬ್ಬಗಳು ಮತ್ತು ಪಟಾಕಿ ವಿಷಯ ಬಂದಾಗ ದೊಡ್ಡವರು ಕೂಡ ಮಕ್ಕಳಾಗಿ ಬಿಡುತ್ತಾರೆ!.
ಅದರಲ್ಲೂ ಡಾ ರಾಜಕುಮಾರ್ ರವರು ಪುಟ್ಟ ಮಗುವಿನೊಂದಿಗೆ ನಟಿಸಿರುವ ‘ನಾ ನಿನ್ನ ಮರೆಯಲಾರೆ’ ಚಿತ್ರದಲ್ಲಿ ಪಿ ಬಿ ಶ್ರೀನಿವಾಸ್ ಮತ್ತು ಎಸ್ ಜಾನಕಿ ರವರು ಹಾಡಿರುವ “ಸಿಹಿಮುತ್ತು ಸಿಹಿಮುತ್ತು…” ಈ ಗೀತೆಯ ಮೂಲಕ ದೀಪಾವಳಿ ಹಬ್ಬವನ್ನು ಕಣ್ಣಿಗೆ ಕಟ್ಟುವಂತೆ ಚಿತ್ರೀಕರಿಸಿದ್ದಾರೆ. ಅಲ್ಲಿ ಬರುವ ಹಾಡಿನ ಒಂದು ಪ್ಯಾರಾದಲ್ಲಿ “ಚಿನಕುರುಳಿ ಮಾತಿನಲ್ಲಿ…… ಹೂಬಾಣ ನೋಟದಲ್ಲಿ…… ಕೋಪದಿ ಸಿಡಿದರೆ….. ಆನೆ ಪಟಾಕಿ….!.”- ಈ ಸಾಲುಗಳು ನೆನಪಾಗುತ್ತವೆ.
ಇಷ್ಟೆಲ್ಲಾ ಪಟಾಕಿಗಳೊಂದಿಗೆ ನಮ್ಮಗಳ ಕಾರುಬಾರು ಇದ್ದರೂ ಕೂಡ ನಮಗೆ ಈ ಪಟಾಕಿಗಳು ಒಂದಿಷ್ಟು ಕೂಡ ತೃಪ್ತಿ ತರುತ್ತಿರಲಿಲ್ಲ!. ಹಬ್ಬ ಮುಗಿದರೂ ಪಟಾಕಿ ಯದ್ದೇ ಚಿಂತೆ!.
ಮತ್ತೊಂದಿಷ್ಟು ಪಟಾಕಿ ಹೊಡೆಯೋಣ ಎನ್ನು ಗುಂಗಿನಲ್ಲೇ ನಾವು ಸದಾ ಇರುತ್ತಿದ್ದೆವು!. ಮೂರು ದಿನದಲ್ಲಿ ಪ್ರತಿದಿನದ ರಾತ್ರಿ ಪಟಾಕಿ ಹೊಡೆದ ನಂತರ ಬೆಳಿಗ್ಗೆ ಬೇಗ ಬೇಗ ಎದ್ದು ನಾವು ಪಟಾಕಿ ಹೊಡೆದ ಸ್ಥಳಗಳಿಗೆ ಹೋಗಿ ಅಳಿದುಳಿದ, ಸಿಡಿಯದೇ ಇದ್ದ ಕಳ್ಳ ಪಟಾಕಿಗಳನ್ನೆಲ್ಲ ಒಂದೆಡೆ ಸಂಗ್ರಹಿಸುತ್ತಿದ್ದೆವು!
ಅವನ್ನೆಲ್ಲಾ ಜೋಪಾನವಾಗಿಟ್ಟುಕೊಂಡು ನಮ್ಮ ಮನೆಯಿಂದ ಸ್ವಲ್ಪ ಹೊರಗಡೆ ಹೋಗಿ ಒಂದೆಡೆ ಪೇಪರ್ ಮೇಲೆ ಹಾಕಿ, ಬೆಂಕಿ ಹಚ್ಚಿದಾಗ ಬರುವ ಚಿಟಪಟ ಎನ್ನುವ ಒಂದು ರೀತಿಯಲ್ಲಿ ಶಬ್ದ… ಒಮ್ಮೊಮ್ಮೆ ಡಮ್ ಎನ್ನುವ ಶಬ್ದ… ನಮಗೆ ತುಂಬಾ ತುಂಬಾ ಸಂತಸ ನೀಡುತ್ತಿತ್ತು!.
ಮಾಮೂಲು ಪಟಾಕಿ ಹೊಡೆಯುವುದಕ್ಕಿಂತಲೂ ಕೂಡ ಈ ಒಂದು ಘಟನೆ ನಮ್ಮ ಸಂಭ್ರಮವನ್ನು ಹೆಚ್ಚಿಸುತ್ತಿತ್ತು. ನಂತರ ನಮ್ಮ ಕೈಗಳೆಲ್ಲಾ ಬಿಳಿ ಮಿಶ್ರಿತ ಮದ್ದು ಅಂಟಿಕೊಂಡಿದ್ದರಿಂದ ಮನೆಯಲ್ಲಿ ಮತ್ತೆ ಎಂದಿನಂತೆ ಬೈಗುಳ….! “ಪಟಾಕಿ” ಎಂಬ ಸಂಭ್ರಮದ ನಡುವೆ ನಮಗೆ ಅದೆಲ್ಲಾ ಮರೆತೇ ಹೋಗುತ್ತಿತ್ತು!.ಈಗ ಎಲ್ಲಾ ಹಬ್ಬಗಳಿಗೂ ಪಟಾಕಿ ಇದ್ದೇ ಇದೆ!.
ವರ್ಷಕ್ಕೆ ಮೂರು ದಿನ ಮಾತ್ರ ಪಟಾಕಿಗಳನ್ನು ಹೊಡೆಯುತ್ತಿದ್ದ ಆ ಸಂಭ್ರಮವೆಲ್ಲಿ?!. ಈಗ ಎಲ್ಲಾ ಹಬ್ಬಗಳಿಗೆ, ದೇವರ ಉತ್ಸವಗಳಿಗೆ, ಹುಟ್ಟುಹಬ್ಬ ಇನ್ನಿತರ ಆಚರಣೆಗಳಲ್ಲಿ ಕೂಡ ಪಟಾಕಿ ನಮ್ಮೊಟ್ಟಿಗೆ ಇದ್ದರೂ ಕೂಡ ಆ ಸಂಭ್ರಮ ಇವತ್ತು ಸಿಗುತ್ತಿಲ್ಲ.
ನಮ್ಮ ಮಕ್ಕಳಿಗೆ ದೊಡ್ಡ ದೊಡ್ಡ ಬಾಕ್ಸ್ ಗಳಲ್ಲಿ ಎಲ್ಲಾ ರೀತಿಯ ಪಟಾಕಿಗಳನ್ನು ತೆಗೆದುಕೊಟ್ಟರು ಸಹ ಪಟಾಕಿಯನ್ನು ಹೊಡೆಯುವ ಸಂಭ್ರಮವಿಲ್ಲ.
ದೊಡ್ಡವರು ಕೂಡ ಆ ಪಟಾಕಿ ಹೊಡೆಯುವ ಮಕ್ಕಳ ಕ್ಷಣಗಳನ್ನೂ ಸವಿಯಲು ಕೂಡ ಸಮಯವಿಲ್ಲ. ಇವೆಲ್ಲ ಕಾಣೆಯಾಗುತ್ತಿವೆ!.ಪಟಾಕಿ ಹೊಡೆದ ನಂತರ ಎಚ್ಚುತ್ತಿರುವ ಮಾಲಿನ್ಯ.
ಮುಂದುವರೆದು ಪರಿಸ್ಥಿತಿ ಹೇಗಾಗಿದೆ ಎಂದರೆ ಪೈಪೋಟಿ ಯಾಗಿ ಪಟಾಕಿಗಳನ್ನು ಚೀಟಿ ಹಾಕುವುದರ ಮೂಲಕ ಕೊಂಡುಕೊಂಡು ಪ್ರತಿ ಮನೆಯಲ್ಲೂ, ಪ್ರತಿ ಬೀದಿಯಲ್ಲಿ ಕೂಡ ಪಟಾಕಿಗಳನ್ನು ಹೆಚ್ಚೆಚ್ಚು ಹೊಡೆಯುವುದೇ ಒಂದು ರೀತಿಯಲ್ಲಿ ಹಬ್ಬವಾಗಿದೆ!. ನಂತರದಲ್ಲಿ ರಾಸಾಯನಿಕ ಯುಕ್ತ ಪಟಾಕಿಗಳ ಅವಶೇಷಗಳು ಕೆರೆ, ಕಾಲುವೆ, ನದಿ ಮೂಲಕ ಸೇರಿ ಮತ್ತೆ ನಾವು ಆ ಮಲಿನ ಯುಕ್ತ ನೀರನ್ನು ಬಳಸುವಂತೆ ಆಗುತ್ತಿದೆ.
ಜೊತೆಗೆ ಭೂಮಿಯ ಅಂತರಂಗ ಸೇರುತ್ತಿರುವುದು ಒಂದೆಡೆಯಾದರೆ, ಮತ್ತೊಂದೆಡೆ ಹೆಚ್ಚು ಶಬ್ದ ಮಾಲಿನ್ಯಕ್ಕೂ ಕಾರಣವಾಗುತ್ತಿದೆ.
ಯಾವುದೇ ರೀತಿಯ ಮುಂಜಾಗ್ರತೆ ಕ್ರಮವನ್ನು ಅನುಸರಿಸದೆ ದೊಡ್ಡ ದೊಡ್ಡ ಪಟಾಕಿಗಳನ್ನು… ಅಟಂಬಾಂಬ್ಗಳನ್ನು ಸಿಡಿಸುವುದು ಅದು ಸಿಡಿಯಲಿಲ್ಲ ಎಂದು ಹತ್ತಿರ ಹೋಗಿ ನೋಡುವುದು ನಂತರ ಡಮ್ ಎಂದು ಸಿಡಿಯುವುದು ಇದರಿಂದಾಗಿ ಅನೇಕ ಅನಾಹುತಗಳು ಉಂಟಾಗಿವೆ.
ಎಷ್ಟೋ ಮಂದಿ ದೊಡ್ಡ ದೊಡ್ಡ ಪಟಾಕಿಗಳನ್ನು ಕೈಯಲ್ಲಿ ಹಿಡಿದು ಸಿಡಿಸುತ್ತಾರೆ. ಮೈ- ಕೈಗಳಿಗೆ ನೋವು ಮಾಡಿ ಕೊಳ್ಳುವುದರ ಜೊತೆಗೆ, ಕಣ್ಣು ದೃಷ್ಟಿ ಕಳೆದುಕೊಂಡವರು ಹೆಚ್ಚಾಗುತ್ತಿದ್ದಾರೆ.
ಆ ಸಮಯದಲ್ಲಿ ದೊಡ್ಡವರಾದವರು ನಾವು ಮುಂಜಾಗ್ರತೆ ಕ್ರಮ ವಹಿಸಿ ಮಕ್ಕಳು ಪಟಾಕಿಗಳನ್ನು ಹೊಡೆಯುವಾಗ ನಾವು ಹತ್ತಿರದಲ್ಲೇ ಇದ್ದುಕೊಂಡು ಅವರಿಗೆ ನೆರವಾಗಬೇಕು.
ನಗರ ಪ್ರದೇಶಗಳಲ್ಲಿ ನಿಗದಿತ ಸ್ಥಳದಲ್ಲೇ ಪಟಾಕಿ ಅಂಗಡಿಗಳನ್ನು ತೆರೆಯಲು ಅನುಮತಿ ನೀಡುತ್ತದೆ. ಆ ಸಂದರ್ಭದಲ್ಲಿ ಎಲ್ಲಾ ರೀತಿಯ ಮುನ್ನೆಚ್ಚರಿಕೆ ಕ್ರಮವನ್ನು ಕೂಡ ವಹಿಸುತ್ತಿದೆ. ಪರಿಸರ ಸ್ನೇಹಿ ದೀಪಾವಳಿ ಹಬ್ಬವನ್ನು ಆಚರಿಸಲು ಎಲ್ಲೆಡೆ ಕರೆ ನೀಡುತ್ತಿದ್ದರು ಕೂಡ ಈ ಪಟಾಕಿಗಳ ಹಾವಳಿಯಿಂದ ಪರಿಸರ ಮಾಲಿನ್ಯ ಹಾಳಾಗುತ್ತಿದೆ. ಪಟಾಕಿ ಹೊಡೆಯಲು ನಿಗದಿತ ಸಮಯ.
ದೀಪಾವಳಿ ಹಬ್ಬದ ಹಿನ್ನೆಲೆಯಲ್ಲಿ ನಿತ್ಯ ರಾತ್ರಿ 8 ರಿಂದ 10ರವರೆಗೆ ಎರಡು ಗಂಟೆ ಮಾತ್ರ ಪಟಾಕಿ ಹೊಡೆಯಲು ಅವಕಾಶ ನೀಡುವ ಮೂಲಕ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ (ಕೆಎಸ್ ಪಿಸಿಬಿ) ಸುತ್ತೋಲೆಯನ್ನು ವರ್ಷದಿಂದ ವರ್ಷಕ್ಕೆ ತನ್ನದೇ ಆದ ಮಾರ್ಗಸೂಚಿಯೊಂದಿಗೆ ಜಾಗೃತಿ ಮೂಡಿಸುತ್ತಿದೆ.
ಪ್ರತಿಯೊಂದು ಹಬ್ಬಗಳು ಕೂಡ ಒಂದಲ್ಲ ಒಂದು ರೀತಿಯಲ್ಲಿ ಸಂಭ್ರಮ ತರುತ್ತವೆ ನಿಜ. ಆದರೆ ಆ ಹಬ್ಬದ ಆಚರಣೆಯ ನೆಪದಲ್ಲಿ ನಮ್ಮ ಸಂಸ್ಕೃತಿಗೆ….. ನಮ್ಮ ಪರಿಸರಕ್ಕೆ….. ಯಾವುದೇ ರೀತಿಯಲ್ಲಿ ಧಕ್ಕೆ ಆಗದಂತೆ ನಾವೆಲ್ಲರೂ ಕೂಡ ನೋಡಿಕೊಳ್ಳಬೇಕು. ಇದು ನಮ್ಮ ಆದ್ಯ ಕರ್ತವ್ಯವಾಗಬೇಕು. ನಾವು ಮೊದಲು ಹಸಿರು ಪಟಾಕಿಗಳನ್ನು ಮಾತ್ರ ಹೊಡೆಯಬೇಕು.
ಈ ದೀಪಾವಳಿ ಹಬ್ಬ ಎಲ್ಲರ ಮನೆ- ಮನಗಳನ್ನು ಬೆಳಗಲಿ. ಜೊತೆಗೆ ನಾವು ಪಟಾಕಿಗಳನ್ನು ಹೊಡೆಯುವಾಗ ಹೆಚ್ಚು ಮುಂಜಾಗ್ರತಾ ಕ್ರಮವನ್ನು ವಹಿಸೋಣ. ವಯಸ್ಸಾದವರು…. ಅನಾರೋಗ್ಯದಿಂದ ಇರುವವರು…. ನಮ್ಮ ಸುತ್ತ ಮುತ್ತ ಇದ್ದೇ ಇರುತ್ತಾರೆ. ಜೊತೆಗೆ ಅಕ್ಕಪಕ್ಕದ ಮನೆಗಳಿಗೆ, ಬಡಾವಣೆಯವರಿಗೆ ಯಾವುದೇ ರೀತಿಯಲ್ಲಿ ತೊಂದರೆ ಕೊಡದೆ, ನಿಗದಿತ ಸಮಯದಲ್ಲಿ….. ನಿಗದಿತ ಸ್ಥಳದಲ್ಲಿ…. ಪಟಾಕಿಗಳನ್ನು ಹಚ್ಚೋಣ. ನಮ್ಮ ಪರಿಸರವನ್ನು ಕಾಪಾಡೋಣ.
ಇನ್ನೊಂದು ಮುಖ್ಯವಾದ ಅಂಶವೆಂದರೆ...... ಈಗಾಗಲೇ ಪಟಾಕಿಯ ಕಾರ್ಖಾನೆಗಳು ಒಂದಲ್ಲ ಒಂದು ರೀತಿಯಲ್ಲಿ ಅಗ್ನಿ ದುರಂತಕ್ಕೆ ಒಳಗಾಗಿ ಹಲವರು ಪ್ರಾಣ ಬಿಟ್ಟಿದ್ದಾರೆ. ಇದನ್ನು ಗಮನಿಸಿದ ಸರ್ಕಾರ ಪಟಾಕಿಯನ್ನು ಸಂಪೂರ್ಣವಾಗಿ ನಿಷೇಧಿಸಲು ಕ್ರಮ ಕೈಗೊಳ್ಳುತ್ತಿದೆ. ಈವರೆವಿಗೂ ಕೂಡ ಹಸಿರು ಪಟಾಕಿಗಳನ್ನು ಮಾತ್ರ ಹಚ್ಚಲು ಸಲಹೆ ನೀಡಿದೆ.
ನಾವು ಯಾವುದೇ ಕಾನೂನು ಮಾಡಲಿ ಎಂದು ಕೂರದೇ ನಮ್ಮ ಮುಂಜಾಗ್ರತೆಯಿಂದ ನಾವು ಪಟಾಕಿಗಳನ್ನು ಹಚ್ಚಬೇಕು. ಜೊತೆಗೆ ನಿಗದಿತ ಸಮಯದಲ್ಲಿ ಎಲ್ಲರೂ ಒಟ್ಟಾಗಿ ಪಟಾಕಿಯನ್ನು ಹಚ್ಚುವುದರ ಮೂಲಕ ಸಂಭ್ರಮ ಪಡಬೇಕು.
ಅದರಲ್ಲೂ ನಾ ಮೊದಲೇ ಹೇಳಿದಂತೆ ಮಕ್ಕಳು ಪಟಾಕಿ ಹಚ್ಚುವಾಗ ದೊಡ್ಡವರು ಇರಲೇಬೇಕು. ಕೆಲವೊಮ್ಮೆ ಕೃಷ್ಣ ಚಕ್ರ, ಹೂವಿನ ಕುಡುಕಗಳು ಕೂಡ ಸಿಡಿದುಬಿಡುತ್ತವೆ!.
ದೀಪಾವಳಿ ಹಬ್ಬ ಬಂತೆಂದರೆ ಸಾಕು ಮೂರು ದಿನವೂ ಕೂಡ ಪಟಾಕಿ ಹಚ್ಚುವ ಸಂಭ್ರಮದಲ್ಲಿ ಅನೇಕರು ಕಣ್ಣುಗಳನ್ನು ಕಳೆದುಕೊಳ್ಳುತ್ತಾರೆ.
ಕ್ಷಣಿಕ ಮಾತ್ರದಲ್ಲಿ ಹಚ್ಚುವ ಪಟಾಕಿ ಜೀವನಪೂರ್ತಿ ನಮ್ಮ ಕಣ್ಣುಗಳನ್ನು ಕಿತ್ತುಕೊಳ್ಳುತ್ತದೆ. ಜೊತೆಗೆ ಪಟಾಕಿಯಿಂದ ಹೊರ ಬರುವ ಹೊಗೆ ಪರಿಸರಕ್ಕೆ ಮಾರಕ. ಇದರಿಂದಾಗಿ ಅನೇಕ ಉಸಿರಾಟದ ಸಮಸ್ಯೆ ಬಂದಿದೆ.
ನಗರ ಪ್ರದೇಶದಲ್ಲಿ ನಿಗದಿತ ಸ್ಥಳದಲ್ಲಿ ಪಟಾಕಿ ಅಂಗಡಿಗಳಿಗೆ ಅನುಮತಿ ನೀಡುತ್ತಿದೆ. ಪಟಾಕಿ ವಿಷಯ ಬಂದಾಗ ನಾವು ಎಷ್ಟು ಮುಂಜಾಗ್ರತೆ ಕ್ರಮ ವಹಿಸಿದರು ಸಾಲದು.
ನಮ್ಮ ಬಾಲ್ಯದಲ್ಲಿ ಕಡಿಮೆ ಪಟಾಕಿಕೊಂಡು ಹೆಚ್ಚು ಸಂಭ್ರಮ ಪಡುತ್ತಿದ್ದೆವು. ಈಗ ಪಟಾಕಿಯ ಬೆಲೆಯೂ ಕೂಡ ಗಗನಕ್ಕೇರಿದೆ. ಸಾವಿರಾರು ರೂಪಾಯಿಗೆ ಪಟಾಕಿಕೊಂಡರು ಕಡಿಮೆ ಪಟಾಕಿಗಳು ಬರುತ್ತವೆ.
ಎಲ್ಲರೂ ಕೂಡ ಒಟ್ಟಾಗಿ ಸಡಗರ ಸಂಭ್ರಮದಿಂದ ದೀಪಾವಳಿ ಹಬ್ಬವನ್ನು ಆಚರಿಸೋಣ. ಎಲ್ಲರಿಗೂ ಕೂಡ ದೀಪಾವಳಿ ಹಬ್ಬದ ಹಾರ್ದಿಕ ಶುಭಾಶಯಗಳು.
-ಕಾಳಿಹುಂಡಿ ಶಿವಕುಮಾರ್, ಮೈಸೂರು.
9844883581.