- ಬ್ರಹ್ಮ ಕುಮಾರಿ ಈಶ್ವರಿ ವಿದ್ಯಾಲಯದ ಕುಮಾರಿ ಸಂಧ್ಯಾ ಅಭಿಪ್ರಾಯ
- ಬಸವಮಾರ್ಗ ಫೌಂಡೇಷನ್ ಕುಡಿತ ಬಿಡಿಸುವ ಉಚಿತ ಶಿಬಿರ ಸಮಾರೋಪ
- ಸಂಸ್ಥಾಪಕ ಎಸ್. ಬಸವರಾಜು ಭಾಗಿ
ಮೈಸೂರು : ಸ್ವ ಪರಿವರ್ತನೆಯಿಂದ ವಿಶ್ವ ಪರಿವರ್ತನೆ ಸಾಧ್ಯ. ಜೀವನ ಪರಿವರ್ತನೆ ಮಾಡಿಕೊಳ್ಳುವುದು ನಮ್ಮ ಕೈಯಲ್ಲಿ ಇದೆ ಎಂದು ಬ್ರಹ್ಮ ಕುಮಾರಿ ಈಶ್ವರಿ ಮಹಾ ವಿದ್ಯಾಲಯದ ಮೈಸೂರು ಘಟಕದ ಮುಖ್ಯಸ್ಥರಾದ ಕುಮಾರಿ ಸಂಧ್ಯಾ ಅವರು ಹೇಳಿದರು.
ನಗರದ ಹೆಬ್ಬಾಳಿನಲ್ಲಿ ಇರುವ ಬಸವಮಾರ್ಗ ವ್ಯಸನಮುಕ್ತ ಮತ್ತು ಪುನರ್ವಸತಿ ಕೇಂದ್ರದಿಂದ ಪುರುಷರು ಮತ್ತು ಮಹಿಳೆಯರಿಗೆ ಆಯೋಜಿಸಿದ್ದ 55ನೇ 10 ದಿನಗಳ ಕುಡಿತ ಬಿಡಿಸುವ ಉಚಿತ ಶಿಬಿರದ ಹಿನ್ನೆಲೆಯಲ್ಲಿ ನಗರದ ಸರಸ್ವತಿಪುರಂ ನಲ್ಲಿರುವ ಬಸವಮಾರ್ಗ ಮಾನಸಿಕ ಆಸ್ಪತ್ರೆ ಮತ್ತು ಪುನರ್ವಸತಿ ಕೇಂದ್ರದಲ್ಲಿ ಮಂಗಳವಾರ ಆಯೋಜಿಸಿದ್ದ ಸಮಾರೋಪ ಸಮಾರಂಭದಲ್ಲಿ ಅವರು ಮಾತನಾಡಿದರು.
ಜೀವನ ಪರಮಾತ್ಮ ಕೊಟ್ಟ ಕೊಡುಗೆ. ವ್ಯರ್ಥ ವ್ಯಸನಗಳಿಂದ ಬದುಕು ನಾಶವಾಗಬಾರದು. ನಮ್ಮ ಜೀವಿತಾವಧಿಯಲ್ಲಿ ನಾಲ್ಕಾರು ಜನರಿಗೆ ಉಪಕಾರವಾಗುವಂತೆ ಜೀವಿಸಬೇಕು. ಈ ನಿಟ್ಟಿನಲ್ಲಿ ಶ್ರೇಷ್ಠ ಸಂಕಲ್ಪ ಮಾಡಬೇಕು. ಪ್ರತಿ ದಿನ ಶುದ್ಧವಿಚಾರ ಮಾಡಬೇಕು. ನಮ್ಮನ್ನು ನಾವು ಉದ್ಧರಿಸಿಕೊಳ್ಳಲು ನಿತ್ಯ ಪ್ರಯತ್ನ ಮಾಡಬೇಕು. ಆಗಿದ್ದರೆ ಮಾತ್ರ ಜೀವನದಲ್ಲಿ ಬದಲಾವಣೆ ಸಾಧ್ಯ ಎಂದು ಸಲಹೆ ನೀಡಿದರು.
ಆರೋಗ್ಯ ಎಂದರೆ ಕೇವಲ ದೈಹಿಕ ಆರೋಗ್ಯವಲ್ಲ. ಮಾನಸೀಕ, ದೈಹಿಕ, ಸಾಮಾಜಿಕ, ಕೌಟುಂಬಿಕ ಹಾಗೂ ಆಧ್ಯಾತ್ಮಿಕವಾಗಿ ಆರೋಗ್ಯವಾಗಿದ್ದರೆ ಮಾತ್ರ ವ್ಯಕ್ತಿಯನ್ನು ಆರೋಗ್ಯವಂತ ಎನ್ನುತ್ತಾರೆ. ಹಾಗಾಗಿ ನಾವು ಆರೋಗ್ಯವಾಗಿರಲು ಸದಾ ಪ್ರಯತ್ನಿಸಬೇಕು. ಇದು ಶ್ರೇಷ್ಟ ಗುಣಗಳನ್ನು ಅಳವಡಿಸಿಕೊಂಡು ಆಚರಣೆಗೆ ತರವುದರಲ್ಲಿ ಮಾತ್ರ ಆಡಗಿದೆ. ತಂದೆಯಾಗಿ, ತಾಯಿಯಾಗಿ ಜೀವನದ ನಮ್ಮ, ನಮ್ಮ ಕರ್ತವ್ಯಗಳನ್ನು ಸಮರ್ಪಕವಾಗಿ ನಿರ್ವಹಿಸಬೇಕು. ಆಗಿದ್ದರೆ ಮಾತ್ರ ವ್ಯಕ್ತ ಉತ್ತಮ ಪ್ರಜೆಯಾಗಿ ಸಮಾಜ, ಕುಟುಂಬದಲ್ಲಿ ಬಾಳಲು ಸಾಧ್ಯ ಎಂದು ಅಭಿಪ್ರಾಯಪಟ್ಟರು.
ವ್ಯಸನ ಮುಕ್ತ ಜೀವನಕ್ಕಾಗಿ, ಒಳ್ಳೆಯ ಅಭ್ಯಾಸಗಳನ್ನು ರೂಢಿಸಿಕೊಳ್ಳಬೇಕು. ನಿಮ್ಮ ಗುರಿಗಳ ಮೇಲೆ ಗಮನ ಕೇಂದ್ರೀಕರಿಸಬೇಕು. ಅಗತ್ಯವಿದ್ದರೆ ವೃತ್ತಿಪರ ಸಹಾಯವನ್ನು ಪಡೆಯಬೇಕು. ಈ ಹಂತಗಳು ವ್ಯಸನದಿಂದ ಹೊರಬರಲು ಮತ್ತು ಆರೋಗ್ಯಕರ ಜೀವನಶೈಲಿಯನ್ನು ಬೆಳೆಸಲು ಸಹಾಯ ಮಾಡುತ್ತದೆ. ಅವರು ಬದಲಾಗಲಿ, ಇವರು ಬದಲಾಗಲಿ ಎಂದು ನಿರೀಕ್ಷೆ ಮಾಡಬಾರದು. ಮೊದಲು ನಾವು ಬದಲಾಗಬೇಕು. ಬದಲಾವಣೆ ನಮ್ಮಿಂದ ಪ್ರಾರಂಭವಾಗಬೇಕು. ಹಾಗಾಗಿ ನಮ್ಮ ಯೋಚನೆ, ಚಿಂತನೆ ಇಂದಿನಿಂದಲೇ ಬದಲಾಗಬೇಕು ಎಂದು ಸಲಹೆ ನೀಡಿದರು.
ಬಸವಮಾರ್ಗ ಫೌಂಡೇಶನ್ ಸಂಸ್ಥಾಪಕರಾದ ಎಸ್.ಬಸವರಾಜು ಅವರು ಮಾತನಾಡಿ, ವ್ಯಸನಮುಕ್ತ ಜೀವನ ಬದಲಾವಣೆಗೆ ಬಸವಮಾರ್ಗ ಸಂಸ್ಥೆ ವ್ಯಸನಿಗಳಿಗೆ ವೇದಿಕೆ ಕಲ್ಪಿಸಿ ಕೊಡಲಾಗಿತ್ತು. 55ನೇ 10 ದಿನಗಳ ಈ ಶಿಬಿರಕ್ಕೆ ರಾಜ್ಯದ ನಾನಾ ಮೂಲೆಗಳಿಂದ 200 ಕ್ಕೂ ಹೆಚ್ಚು ಜನರು ಆಗಮಿಸಿದ್ದರು. ಶಿಬಿರಾರ್ಥಿಗಳು ವ್ಯಸನಮುಕ್ತರಾಗಲು ನಾನಾ ಕೌಶಲಗಳನ್ನು ಶಿಬಿರದಲ್ಲಿ ಹೇಳಿಕೊಡಲಾಗಿದೆ. ಅಷ್ಟೂ ಅಂಶವನ್ನು ಎಂದಿಗೂ ಮರೆಯಬಾರದು. ಶಿಬಿರದ ದೈನಂದಿನ ಕಾರ್ಯಕ್ರಮವನ್ನು ಮನೆಯಲ್ಲೂ ಪಾಲನೆ ಮಾಡಬೇಕು. ಇದರಿಂದ ವ್ಯಸನಮುಕ್ತರಾಗಲು ಸಾಧ್ಯ. ಶಿಬಿರಾರ್ಥಿಗಳು ಈ ಬದಲಾವಣೆ ಹಾದಿ ಹಿಡಿದು ಜೀವನವನ್ನು ಸರಿಪಡಿಸಿ ಕೊಳ್ಳಬೇಕು ಎಂದು ಕಿವಿಮಾತು ಹೇಳಿದರು.
ಇಡೀ ಜಗತ್ತಿನಲ್ಲಿ ಪ್ರತಿಯೊಬ್ಬರಿಗೂ ಒಂದಲ್ಲ ಒಂದು ರೀತಿಯಲ್ಲಿ ಸೂರು ಇದೆ. ಆದರೆ ವ್ಯಸನಕ್ಕೆ ದಾಸನಾದ ವ್ಯಕ್ತಿಗೆ ಎಲ್ಲೂ ಸೂರಿಲ್ಲ. ವ್ಯಸನಕ್ಕೆ ದಾಸನಾದ ವ್ಯಕ್ತಿ ಸಮಾಜದಲ್ಲಿ ಎಲ್ಲರಿಂದಲೂ ಮೋಸಕ್ಕೆ ಒಳಗಾಗುತ್ತಾನೆ. ನಾನು ಕೂಡ 17 ವರ್ಷ ಕುಡಿತಕ್ಕೆ ದಾಸನಾಗಿದ್ದೆ. ಮೋಸಹೋಗಿ ಎಲ್ಲವನ್ನು ಕಳೆದುಕೊಂಡಿದ್ದೆ. ಅದನ್ನು ತ್ಯಜಿಸಿದ ಮೇಲೆ ವ್ಯಸನಕ್ಕೆ ದಾಸರಾದವರಿಗೆ ಏನಾದರೂ ಒಂದು ಸೂರ ಕಲ್ಪಿಸಿಕೊಡಬೇಕು ಎಂದು ಮನಗಂಡು ಬಸವಮಾರ್ಗ ಸಂಸ್ಥೆ ಸ್ಥಾಪನೆ ಮಾಡಲಾಯಿತು. ಕಳೆದ 6 ವರ್ಷಗಳಿಂದು 13 ಸಾವಿರಕ್ಕೂ ಹೆಚ್ಚು ವ್ಯಸನಿಗಳು ನಮ್ಮಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ಸಾವಿರಾರು ಕುಟುಂಬಗಳು ಇಂದು ನೆಮ್ಮದಿಯಾಗಿವೆ ಎಂದು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಆಪ್ತ ಸಮಾಲೋಚಕರಾದ ಉಷಾರಾಣಿ, ಮನೋಜ್ ದೇವ್, ಸಿಬ್ಬಂದಿ ರಾಘವೇಂದ್ರ, ಸುಮತಿ ಇತರರು ಇದ್ದರು.