ಚಾಮರಾಜನಗರ : ಕರ್ನಾಟಕ ರಾಜ್ಯ ಅನುಮತಿ ಪಡೆದ ವಿದ್ಯುತ್ ಗುತ್ತಿಗೆದಾರರ ಸಂಘ ಪಂಚವಾರ್ಷಿಕ ಕೇಂದ್ರ ಸಮಿತಿಗೆ ಡಿ. 14 ರಂದು ನಡೆಯಲಿರುವ ಚುನಾವಣೆಯಲ್ಲಿ ಆರ್ಆರ್ ತಂಡಕ್ಕೆ ಚಾಮರಾಜನಗರ ಜಿಲ್ಲಾ ವಿದ್ಯುತ್ ಗುತ್ತಿಗೆದಾರರು ತಮ್ಮ ಅಮೂಲ್ಯವಾದ ಮತವನ್ನು ನೀಡಿ ಜಯಶೀಲರನ್ನಾಗಿ ಮಾಡುವ ಮೂಲಕ ತಮ್ಮ ಸೇವೆ ಮಾಡುವ ಅವಕಾಶವನ್ನು ಕಲ್ಪಿಸಿಕೊಡಬೇಕು ಎಂದು ಸಿ.ರಮೇಶ್ ಮನವಿ ಮಾಡಿದರು.
ನಗರದ ರಾಯಲ್‌ ಬ್ರದರ್ ಪಾರ್ಟಿ ಹಾಲ್‌ನಲ್ಲಿ ಕರ್ನಾಟಕ ರಾಜ್ಯ ಅನುಮತಿ ಪಡೆದ ವಿದ್ಯುತ್ ಗುತ್ತಿಗೆದಾರರ ಸಂಘ ಜಿಲ್ಲಾ ಸಮಿತಿ ವತಿಯಿಂದ ಪಂಚವಾರ್ಷಿಕ ಕೇಂದ್ರ ಸಮಿತಿಯ ಚುನಾವಣೆ ಅಂಗವಾಗಿ ಆರ್ಆರ್ ತಂಡ ವತಿಯಿಂದ ನಡೆದ ಚುನಾವಣಾ ಪೂರ್ವಭಾವಿ ಸಭೆಯಲ್ಲಿ ಅವರು ಮಾತನಾಡಿದರು.
ಸಂಘದ ಆರ್ಥಿಕ ಸ್ಥಿತಿಗೆ ಸಂಬಂಧಿಸಿದಂತೆ ಇನ್ನೂ ಅಗತ್ಯವಿರುವ ನೀತಿಗಳನ್ನು ಯೋಜನೆಗಳನ್ನು ರೂಪಿಸಿ ಆರ್ಥಿಕವಾಗಿ ಸಂಘವನ್ನು ಮತ್ತಷ್ಟು ಸದೃಢಗೊಳಿಸಲಾಗುವುದು. ಬೆಂಗಳೂರು ವ್ಯಾಪ್ತಿಯಲ್ಲಿ ಬೃಹತ್ ಸಮುದಾಯ ಭವನವನ್ನು ನಿರ್ಮಿಸಿ ಸಂಘದ ಸದಸ್ಯರುಗಳಿಗೆ ಹಾಗೂ ಅವರ ಕುಟುಂಬಗಳಿಗೆ ಅನುಕೂಲ
ಕಲ್ಪಿಸಲಾಗುವುದು.ರಾಜ್ಯದಲ್ಲಿರುವ ಎಲ್ಲಾ 31 ಜಿಲ್ಲಾ ಸಮಿತಿಗಳು, ತಾಲ್ಲೂಕು ಸಮಿತಿಗಳು ಹಾಗೂ ಉಪ ಸಮಿತಿಗಳಿಗೆ ಕಡ್ಡಾಯವಾಗಿ ಸ್ವಂತ 3 ನಿವೇಶನ ಹಾಗೂ ಸ್ವಂತ ಕಟ್ಟಡ ಸೌಲಭ್ಯ ಹೊಂದಲು ಮುಂದಿನ 5 ವರ್ಷಗಳಲ್ಲಿ ಕಾರ್ಯಯೋಜನೆ ರೂಪಿಸಲಾಗುವುದು ಎಂದರು
ಲೋಕೋಪಯೋಗಿ ಇಲಾಖೆಯಲ್ಲಿ ನಡೆಸುವ ಕಾಮಗಾರಿಗಳಲ್ಲಿ 0.5% ಹಣವನ್ನು ಕಡಿತಗೊಳಿಸಿ ಆ ಹಣವನ್ನು ಕಾಮಗಾರಿ ನಡೆಸುವ ಸಿವಿಲ್ ಗುತ್ತಿಗೆದಾರರ ಕಲ್ಯಾಣ ಕಾರ್ಯಗಳಿಗೆ ಬಳಸಿಕೊಳ್ಳುತ್ತಿದ್ದು ಅಂತೆಯೇ ಇಂಧನ ಇಲಾಖೆಯ ವತಿಯಿಂದ ನಡೆಸುವ ಕಾಮಗಾರಿಗಳಲ್ಲಿಯೂ ಸಹ ಇನ್ನು ಮುಂದೆ 0.5% ಹಣವನ್ನು ಕ್ರೂಡೀಕರಿಸಿ ಆಯಾ ಸ್ಥಳೀಯ ವಿದ್ಯುತ್ ಗುತ್ತಿಗೆದಾರರ ಕಲ್ಯಾಣ ಕಾರ್ಯಗಳಿಗೆ ಆ ಹಣವನ್ನು ಬಳಸಿಕೊಳ್ಳುವಂತೆ ಅನುವಾಗಲು ಸರ್ಕಾರದಿಂದ ಆದೇಶ ಜಾರಿಗೊಳಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದರು.
ಸದಸ್ಯರುಗಳ ಸುರಕ್ಷತೆಗಾಗಿ ಆರೋಗ್ಯ ಸಮಸ್ಯೆಗಳಾದಾಗ ಅಧ್ಯಕ್ಷರ ನಿಧಿಯಿಂದ ನೀಡಲಾಗುತ್ತಿದ್ದ 10ಸಾವಿರ ಸಹಾಯ ಧನವನ್ನು 15ಸಾವಿರ ರೂಗಳಿಗೆ ಹೆಚ್ಚಿಸಲಾಗುವುದು.
ನೂತನವಾಗಿ ವಿದ್ಯುತ್ ಪರವಾನಗಿ ಪಡೆಯುವವರಿಗೆ ನವೀಕರಣ ಮಾಡಿಸುವವರಿಗೆ ಹಾಗೂ ಸೂಪರ್ ವೈಸರ್ ಮತ್ತು ವೈರ್ ಮೆನ್ ಲೈಸೆನ್ಸ್ ಎಂಡೋಸೆರ್ಂಟ್ ಆಯಾ ಜಿಲ್ಲಾ ಕಛೇರಿಗಳಲ್ಲಿಯೇ ಅಪ್ ಲೋಡ್ ಮಾಡುವ ವ್ಯವಸ್ಥೆ ಕಲ್ಪಿಸಲಾಗುವುದು. ವಿದ್ಯುತ್ ಗುತ್ತಿಗೆದಾರರು ಸಂಘದ ಪ್ರಗತಿಗಾಗಿ, ಸದಸ್ಯರ ಕಲ್ಯಾಣಕ್ಕಾಗಿ ಆರ್.ಆರ್. ತಂಡಕ್ಕೆ ತಮ್ಮ ಅಮೂಲ್ಯವಾದ ಮತವನ್ನು ನೀಡಿ ಜಯಶೀಲರನ್ನಾಗಿ ಮಾಡಬೇಕು ಎಂದು ಕೋರಿದರು.
ಸಭೆಯಲ್ಲಿ ಸಂಘದ ರಾಜ್ಯ ಸಮಿತಿ ಸದಸ್ಯ ತಸ್ಕಿನ್ ಜಿಲ್ಲಾಧ್ಯಕ್ಷ ಜಿ.ಎಂ.ಸುರೇಶ್, ಪ್ರಧಾನ ಕಾರ್ಯದರ್ಶಿ ಭಾನುಪ್ರಕಾಶ್ , ಖಜಾಂಚಿ ಸಿದ್ಧಾರ್ಥ, ಸಂಘಟನಾ ಕಾರ್ಯದರ್ಶಿ ಸಂಪತ್ ಕುಮಾರ್, ಉಪಾಧ್ಯಕ್ಷ ಅನ್ಸರ್ ಅಲಿಖಾನ್, ತಾಲೂಕು ಅಧ್ಯಕ್ಷ ಮಾರಿಮುತ್ತು, ಎಸ್ ಸಿ, ಎಸ್ ಟಿ ಸಂಘದ ಅಧ್ಯಕ್ಷ ನಾಗರಾಜು,ಕೃಷ್ಣ, ಧರ್ಮವೀರ್, ನಾಗೇಂದ್ರ ಗೌಡ, ರಾಜಶೇಖರ, ಶಶಿಧರ್, ಗೋಪಾಲ್, ಗಣೇಶ, ವೆಂಕಟೇಶ್, ನಾಗರಾಜು, ಖದೀರು, ಲಿಂಗರಾಜು, ಲೋಕೇಶ್, ದೇವೇಗೌಡ ಇತರರು ಭಾಗವಹಿಸಿದ್ದರು.